धादिङबाट लागू औषध सेवन गरी सवारी चलाउने ४ चालक पक्राउ

धादिङ । पृथ्वी राजमार्गमा लागू औषध सेवन गरी सवारी साधन चलाउने चार जना चालकलाई प्रहरीले पक्राउ गरेको छ।

सोमबार इलाका प्रहरी कार्यालय गजुरी धादिङ अन्तर्गतका प्रहरी इकाई तथा बैरेनी अस्पतालका चिकित्सकसहितको संयुक्त टोलीले सवारी दुर्घटना न्यूनीकरण गर्ने उद्देश्यले विशेष चेकजाँच अभियान सञ्चालन गरेको थियो।

उक्त अभियानका क्रममा चालकहरूको THC किट मार्फत लागू औषध सेवन गरेकोरनगरेको परीक्षण गरिएको थियो।

परीक्षणका क्रममा चार जना चालकमा लागू पदार्थ सेवन गरेको रिपोर्ट पोजेटिभ देखिएपछि उनीहरूलाई पक्राउ गरिएको प्रहरीले जनाएको छ।

पक्राउ पर्नेहरूमा सिन्धुलीको सुनकोशी गाउँपालिका–३ गल्छेडाका २७ वर्षीय खडकबहादुर धिमाल, चितवन माडी नगरपालिका–५ बसन्तपुरका २९ वर्षीय अंकित चौधरी, धादिङ सिद्धलेक गाउँपालिका–७ आदमटारका २० वर्षीय विवेक माझी र नुवाकोट बेलकोटगढी नगरपालिका–७ डवलीका २७ वर्षीय पुरुषोत्तम मगर रहेका छन्।

उनीहरूलाई लागू औषध नियन्त्रण ऐन, २०३३ अन्तर्गत मुद्दा दर्ता गरी धादिङ जिल्ला अदालतबाट १० दिनको म्याद अनुमति लिई थप अनुसन्धान भइरहेको जिल्ला प्रहरी कार्यालय धादिङका प्रवक्ता तथा सूचना अधिकारी प्रहरी नायव उपरीक्षक प्रकाश दाहालले जानकारी दिनुभयो ।