धादिङको ज्वालामुखी गाउँपालिका देशकै पहिलो नमुना सफा र स्वच्छ स्थानीय तह घोषणा

धादिङ। ज्वालामुखी गाउँपालिकालाई देशकै पहिलो नमुना “सफा र स्वच्छ गाउँपालिका” का रूपमा घोषणा गरिएको छ।

“मिसन २०८२: सफा र स्वच्छ क्षेत्र ज्वालामुखी” नारासहित आइतबार वडा नं. ४ स्थित बराह कालिका माध्यमिक विद्यालयमा आयोजित विशेष समारोहमा प्रतिनिधि सभाका सभामुख डोलप्रसाद अर्यालले औपचारिक रूपमा घोषणा गर्नुभएको हो।

२०८२ भित्रै पूर्ण सरसफाइयुक्त स्थानीय तह बनाउने लक्ष्यसहित सञ्चालन गरिएको अभियानले ज्वालामुखीलाई राष्ट्रिय स्तरमै उदाहरणीय बनाएको छ।

कार्यक्रममा सांसद वोध नारायण श्रेष्ठ, पूर्व मन्त्री रामनाथ अधिकारी, प्रदेश मन्त्री शिवराज अधिकारी लगायतका विशिष्ट व्यक्तित्वहरूको उपस्थिति रहेको थियो।

गाउँपालिका अध्यक्ष यमनाथ दनैको अध्यक्षतामा सम्पन्न कार्यक्रममा जिल्ला तथा छिमेकी स्थानीय तहका प्रमुख-उपप्रमुख, जनप्रतिनिधि र विभिन्न संघसंस्थाको सहभागिता रहेको थियो।

गाउँपालिकाका सबै ७ वडाका ६ हजार ७९ घरधुरीले सरसफाइका १५ सूचक पूरा गरेपछि चार चरणको अनुगमनमार्फत सम्पूर्ण गाउँपालिकालाई नै नमुना घोषणा गरिएको हो।

स्वास्थ्य शाखा प्रमुख सुजन श्रेष्ठका अनुसार प्रत्येक घरधुरीमा सूचक पूरा भएको सुनिश्चित गरेर मात्र घोषणा गरिएको हो।

अभियान अन्तर्गत चर्पीको प्रयोग र खुला दिसामुक्त अवस्थाको दिगोपन, व्यक्तिगत सरसफाइ, शुद्ध पानीको प्रयोग, स्वस्थकर खानपान तथा फोहोर व्यवस्थापनमा विशेष जोड दिइएको थियो।

अभियान सफल बनाउन टोल सुधार समिति, महिला स्वास्थ्य स्वयंसेविका, विद्यालय र क्लबहरूको महत्वपूर्ण भूमिका रहेको गाउँपालिकाले जनाएको छ।

अब ज्वालामुखी गाउँपालिकाले “शून्य फोहोर” अवधारणासहित दीगो सरसफाइका लागि थप कार्यक्रम र बजेट समेत अघि बढाएको छ।

घोषणापछि स्थानीयले पञ्चेबाजा र सांस्कृतिक कार्यक्रममार्फत खुसीयाली मनाएका थिए।