धादिङबेशी-सल्यानटार-आरुघाट सडकको बसभाडा समायोजन, कहाँको कति पुग्यो भाडा ?

धादिङ । धादिङबेसी-आरुघाट लगायतका अस्थायी परमिट प्राप्त सडकहरुमा सञ्चालन हुँदै आएका सार्वजनिक यातायातका भाडादर समायोजन गरिएको छ ।

पक्की भइसकेका ग्रामीण सडकमा समेत वैज्ञानिक आधारविनै अत्यधिक भाडा असुल भइरहेको भन्दै सर्वसाधारणबाट व्यापक गुनासो आएपछि जिल्ला प्रशासन कार्यालय संगै सरोकारवालाबीचको बैठकले नयाँ भाडादर निर्धारण गरेको हो ।

सोमबार विभिन्न यातायात व्यवसायी, राजनीतिक दलका प्रतिनिधि, प्रमुख जिल्ला अधिकारी तथा सुरक्षा निकायका प्रमुखहरू सहभागी बैठकले नयाँ भाडादर तय गरिएको धादिङ मण्डली यातायात प्रा.लिका व्यवस्थापक जय भट्ट (सिताराम) ले बताउनुभयो ।

निर्णयअनुसार धादिङबेसी-सल्यानटार रुटको भाडा १८० रुपैयाँ कायम गरिएको छ भने धादिङबेसी-आरुघाट रुटमा २४० रुपैयाँ निर्धारण गरिएको छ ।

त्यस्तै धादिङबेसी–फुर्केखोला रुटको भाडा ११० रुपैयाँ कायम गरिएको छ ।

नयाँ भाडादर सबै रुट (स्थान) को मूल्य निर्धारण गरेपछि भोलीदेखि नै कार्यान्वयनमा ल्याइने धादिङ मण्डली यातायात प्रा.लिका व्यवस्थापक जय भट्टले जानकारी दिनुभयो ।

यस्तै, जिल्लाभित्र गैरकानुनी रूपमा प्रयोजन विपरीत सञ्चालन भइरहेका सवारी साधनमाथि निगरानी बढाइने निर्णय पनि गरिएको छ।

जिल्ला प्रहरी कार्यालयले ट्राफिक प्रहरीको सहयोगमा यस्ता सवारी साधनलाई कानुनी दायरामा ल्याउने सहमति गरेको छ ।

मुख्य तथा सहायक राजमार्गमा सञ्चालन हुने सार्वजनिक, मालवाहक तथा निजी सवारी साधनमा यातायात व्यवस्था विभागको अनुमति बिना जडान गरिएका उपकरण तथा अन्य सामग्री हटाउन पनि जिल्ला ट्राफिक प्रहरीलाई निर्देशन दिइएको छ।

त्यसैगरी स्थानीय तहभित्र सञ्चालन हुने म्याजिक लगायत अन्य सवारी साधनको भाडादर निर्धारण गर्न सम्बन्धित नगरपालिका तथा गाउँपालिकालाई अनुरोध गर्ने निर्णय गरिएको छ ।

स्थानीय तहले निर्धारण गरेको भाडादर सूचना पार्टीमा टाँस्ने र स्थानीय सञ्चार माध्यममार्फत सार्वजनिक रूपमा प्रचारप्रसार गर्न पनि आग्रह गरिएको छ ।

सर्वसाधारणले लामो समयदेखि ग्रामीण सडकमा मनपरी भाडा लिइएको गुनासो गर्दै आएका थिए ।

नयाँ निर्णयपछि यात्रुहरू केही राहत महसुस गर्ने अपेक्षा गरिएको छ ।

तस्बिर : जय भट्ट