पहुँचका आधारमा अनुदान पाउने प्रणाली अन्त्य गर्छौ : मुख्यमन्त्री जम्कट्टेल

धादिङ,०५ ज्येष्ठ ।
बागमती प्रदेशका मुख्यमन्त्री शालिकराम जम्कट्टेलले पहुँचका आधारमा अनुदान पाउने प्रणाली अन्त्य गर्ने बताएका छन् ।

हेटौँडामा बिहिबार पहाडी क्षेत्र काष्ठफल तथा फलफूल विकास आयोजनाको प्रदेशस्तरीय अन्तक्र्रियामा जम्कट्टेलले वास्तविक किसानलाई समेट्दै प्रदेश सरकार अघि बढ्ने भन्दै किसानलाई निरास नहुन आग्रह गरेका छन् ।

किसानहरु पछिल्लो समय कृषि क्षेत्रमा उत्साहित नभएको उल्लेख गर्दै उनले किसान लक्षित कार्यक्रम ल्याई पहुँचका आधारमा अनुदान पाउने प्रणालीलाई अन्त्य गर्न आफूहरू लागी परेको बताए ।

मुख्यमन्त्री जम्कट्टेलले प्रदेश सरकारले अबका दिनमा व्यक्तिगत फार्मलाई अनुदान नदिने र किसानलाई झन्झटिलो हुने गरी तयार पारिएको कार्यविधिलाई परिवर्तन गरी सहजता प्रदान गर्ने बताए ।

आयोजना तोकिएको स्थानीय तहलाई पकेट क्षेत्र नै बनाएर लैजान सुझाव दिँदै उनले कृषिका नीति तथा कार्यक्रमका मोडेल परिवर्तन गरी आगामी आवमा कार्यक्रम ल्याउने तयारी गरेको समेत बताए ।