धादिङ आएर एमाले महासचिव पोखरेलले भने,‘कार्यकर्ताले नेता बोक्ने होइन पार्टी बोक्ने हो’

धादिङ । नेकपा एमालेका महासचिव शंकर पोखरेलले कर्याकर्ताले नेता बोक्ने नभइ पार्टी बोक्नु पर्ने बताउनुभएको छ।

शुक्रबार सदरमुकाम धादिङबेशी स्थित खुल्लामञ्चमा भएको नेकपा एमाले धादिङको नवौँ जिल्ला अधिवेशनको उद्घाटन समारोहलाई सम्बोधन गर्दै पोखरेलले सो कुरा बताउनुभएको हो ।

उहाँले कार्यकर्ताहरुले पार्टी नबोक्ने र नेता मात्र बोक्दा पार्टी सकिने भन्दै नेताहरु सच्चिन आग्रह गर्नुभयो । महासचिव पोखरेलले भन्नुभयो,‘नेताहरुले आफूलाई धुरी ठान्नु हुन्न, पार्टीलाई धुरी ठान्नु पर्छ ।’

जनताले अस्वीकार गरेकाहरुबाट सरकार संचालन गर्दा जनताले दुख पाएको बताउनुभयो ।

कार्यक्रमका प्रमुख अतिथि समेत रहनुभएका महासचिव पोखरेलले नेकपा एमाले चिन्नका लागि त्रिशुली नदीमाथी बनेका पुल चिने पुग्ने बताउनुभयो ।

राजनीतिक दलका कार्यकर्ताले नेता भन्दा पार्टीलाई विश्वास गरेर जान सके पार्टी मजबुद बन्ने भन्दै उहाँले सिंगो पार्टीलाई भन्दा नेतालाई बढी विश्वास गर्ने परिपाटीले दलहरुमा फुटको अवस्था सिर्जना भएको बताउनुभयो ।

उहाँले भन्नुभयो, ‘युवा देश छाडेर विदेश पलायन हुन परेको छ,एक वर्षमा १४ लाख युवाहरु विभिन्न वहानामा विदेश गए भने देश कसले बनाउँछ,एमाले सरकारमा हुदा विदेशिनेको संख्यामा कमी थियो।’

त्यस्तै नेकपा एमाले जिल्ला बागमती प्रदेश कमिटिका अध्यक्ष कैलास ढुंगेलले काँग्रेस र माओवादीको गठबन्धनलाई कोदो र तोरी शंज्ञा दिनुभएको छ ।

‘कोदो र तोरी मिसाएर पिस्दा न पिठो बन्छ, न त तेल आउँछ । कांग्रेस र माओवादीको गठबन्धन भनेको कोदो र तोरी एकै ठाउँमा पिसेजस्तो हो । न ढिडो खान मिल्छ न तेल हुन्छ’ उहाँले भन्नुभयो।

नवौँ जिल्ला अधिवेशनको उद्घाटन अघि धादिङबेसी पुछारबजारबाट खुल्लामञ्चमा ¥याली प्रदर्शन गरिएको थियो ।

एमाले धादिङ अध्यक्ष भूमि त्रिपाठीको अध्यक्षतामा सम्पन्न भएको कार्यक्रममानेकपा एमाले नेताहरुको र कार्यकर्ताहरुको भव्य सहभागिता रहेको उद्घाटन समारोहमा नेकपा एमाले केन्द्रीय सदस्य तथा धादिङका इन्चार्ज धर्मदत्त देबकोटा, नेपाली काँग्रेस जिल्ला सभापति रामनाथ अधिकारी, नेकपा माओवादी केन्द्रका जिल्ला संयोजक मनराज भण्डारी लगायतले शुभकामना व्यक्त गर्नुभएको थियो ।

७ सय प्रतिनिधि सहभागि हुने अधिवेशन २ दिनसम्म संचालन हुने नेकपा एमाले धादिङका उपसचिव राधिका सापकोटाले जानकारी दिनुभयो ।

अधिवेशनले समृद्ध धादिङको मार्गचित्र प्रस्तुत गर्ने एमाले धादिङका अध्यक्ष त्रिपाठीको भनाई छ ।अधिवेशनले ५ जना पदाधिकारी सहितको १०५ सदस्यीय नयाँ कार्यसमिति चयन गर्ने पनि अध्यक्ष त्रिपाठीले बताउनुभयो ।

नयाँ नेतृत्व चयनको लागि अधिकतम सर्वसम्मत प्रयास गर्ने एमाले नेताहरुले बताएका छन् ।

अधिवेशनमा जनवर्गीय संगठनहरुबाट मनोनित हुने बाहेक ५८० जना प्रतिनिधि सहभागी हुनेछन् । ३० जना सदस्य बराबर १ जना प्रतिनिधि छनोट भएको एमाले धादिङका इन्चार्ज धर्मदक्त देवकोटाले बताउनुभयो ।