एमाले धादिङको अधिवेशन: स्थगित बन्द सत्र सुरु

नेकपा एमाले धादिङको नवौं जिल्ला अधिवेशनमा विवाद उत्पन्न भएपछि स्थगित भएको बन्दसत्र शुरु भएको छ ।

आइतबार बिहान नेकपा एमाले बागमती प्रदेशका अध्यक्ष कैलाश ढुंगेलले अधिवेशन स्थगित भएको भनेर विज्ञप्ती जारी गरेपछि प्रभावित बनेको बन्दसत्र केहीबेर अघि मात्रै शुरु भएको एक नेताले जानकारी दिनुभयो।

ढुंगेलले अर्को सुचना नहुन्जेलका लागि अधिवेशन स्थगित भएको प्रेस विज्ञप्ती जारी गर्नुभएपछी यता एमाले धादिङका अध्यक्ष भुमि त्रिपाठीले बन्द सत्र स्थगित नभएको प्रेस विज्ञप्ती जारी गर्नुभएको छ।

२०८० माघ १९ गतेदेखि जारी नेकपा एमालेको नवौं जिल्ला अधिवेशनको बन्द सत्र सञ्चालन भइ रहेको अवस्थामा केही अनाधिकृत उच्छृङ्खल व्यक्तिले अधिवेशन स्थगित भएको भनि सामाजिक सञ्जाल र मिडियामा फैलाएको भ्रमप्रति नेकपा एमाले धादिङको गम्भिर ध्यानाकर्षण भएको छ,त्रिपाठीद्धारा जारी प्रेस विज्ञप्तीमा भनिएको छ।

‘आफ्नो गुटको हार निश्चित भए पछि नेकपा एमाले बागमती प्रदेश कमिटिको अध्यक्ष कैलाश ढुंगेलले धादिङमा आफ्नो गुट स्थापित गर्न जबरजस्ति अधिवेशन स्थगित गर्न खोजेका अध्यक्ष मंडलका अध्यक्ष धर्मदत्त देवकोटाले बताउनुभयो।

संगठनको लेटर प्याड बिना, न छाप न चलानी मनोमानि ढंगले विज्ञप्ती लेख्दै सिंगो संगठनलाई आफ्नो निजि स्वार्थको निम्ति प्रयोग भयो’ उहाँले भन्नुभयो।

यता बागमती प्रदेश कैलाश ढुंगेलद्धारा बिज्ञप्तीमा बन्दसत्र सुरु हुनुपूर्व १९ गते साँझ करिव ७ बजे बसेको जिल्ला कमिटीको अन्तिम बैठकमा बन्दसत्रमा प्रस्तुत गरिने आवश्यक दस्तावेजहरु, कतिपय नीतिगत निर्णयहरु बन्दसत्र संचालनका लागि आवश्यक अध्यक्ष मण्डल लगायत विभिन्न समितिहरुमा रहने नेताहरुको नाम र जिल्ला कमिटीबाट ५ प्रतिशतले मनोनयन हुने प्रतिनिधिहरुका सम्बन्धमा जिल्ला कमिटी अध्यक्षबाट प्रस्ताव प्रस्तुत हुँदा बैठकका सहभागिहरुबाट छलफलको माग राखेका तर  जिल्ला कमिटी अध्यक्षले जबरजस्ती प्रस्ताव पेश गर्दै एकलौटी निर्णय भएको घोषणा गर्न खोजेपछि बैठक कक्षमा असहज परिस्थिति सृजना हुन पुग्यो र जसको फलस्वरुप जिल्ला कमिटीका सदस्य र नेताहरुमाथि हुलहुज्जत र धक्कामुक्का समेत भएको उल्लेख गरिएको छ ।

त्यस्तै, माघ २० गते बन्दसत्रको सुरुवातबाट नै अघिल्लो दिनभन्दा बढी असहज, आकमक र आतंकित परिस्थिति देखा परेको यही क्रममा भिडन्त भई पार्टी कार्यकर्ता सन्तोष खनालको हात भाँचिएको, जनसंगठनबाट प्रतिनिधित्व गराउँदा जनसंगठन समन्वय सम्बन्धी निर्देशिका २०७८ बमोजिम वर्गिकरण गरी प्रतिनिधिको प्रबन्ध नगरिएको पाइएको, बन्दसत्रमा प्रवेश गर्नु अगाडी प्रतिनिधि निक्यौल गर्ने विषयमा समेत अन्योलता कायम रहेको अवस्था देखिएको, पटकपटक वार्ता छलफलबाट समस्या समाधान गरी बन्दसत्र सूचारु गर्ने प्रयास गर्दा सम्भव नभएको र झन् अशान्त, असहज परिस्थिति देखा परेकाले यो अधिवेशनलाई मर्यादित र विधिसम्मत तरिकाले सम्पन्न गर्न सम्भव नदेखिएकाले अर्को सूचना जारी नहुन्जेलसम्मका लागि अधिवेशन स्थगित गरिएको विज्ञप्तीमा उल्लेख गरिएको छ ।

अधिवेशनको शुक्रबार एमाले महासचिव शंकर पोखरेलले उद्घाटन गर्नुभएको थियो।शनिबार दिउँसो बन्दसत्र सुरु हुने बित्तिकै स्थगित भएको थियो ।

पार्टी अध्यक्ष भुमी त्रिपाठीले औपचारिक रुपले बन्दसत्रमा अध्यक्ष मण्डलको अध्यक्षमा धर्मभक्त देवकोटाको नाम घोषणा भएलगत्तै नेता खेम लोहनी पक्षका नेता कार्यकर्ताले बोलिरहेको माइक समेत थुतेर हुलदंगा गरेका थिए।

१९ गते उद्घाटन सत्र सम्पन्न भएपछि साँझ पार्टी कार्यालयमा बसेको जिल्ला कमिटी बैठकले प्रतिनिधिलाई अन्तिम रुप दिने र अध्यक्ष मण्डलको गठन गर्ने एजेन्डा पारित गरेको थियो ।

जिल्ला कमिटीको बैठकले जिल्ला इन्चार्ज धर्मदत्त देवकोटाको अध्यक्षतामा सहइन्चार्जद्वय जानुका सिंखडा र रेशम लामा, प्रदेश कमिटीका सदस्यद्वय धन बहादुर घले र ध्रुव विश्वकर्मालाई सदस्यको जिम्मेवारी दिने निर्णय भएको थियो ।

अध्यक्ष मण्डलको अध्यक्षमा प्रदेश इन्चार्ज गुरु बराल रहनुपर्छ भन्ने दावीका साथ सिन्धुली जिल्ला इन्चार्ज खेम लोहनी र बागमती प्रदेशका अध्यक्ष कैलाश ढुंगेलले बैठक सकिएपछि विवाद सिर्जना गरेका थिए ।

विवाद उत्पन्न भएपछि प्रतिनिधिलाई उत्तेजित बनाउँदै हिजो लोहनी र प्रदेश कमिटीका सदस्य रमेश आचार्यले रगतको खोलो बगाउने भन्दै होहल्ला सुरु गरेका थिए ।

विवादपछि रातभर बसेको द्वीपक्षीय वार्ता निष्कर्षविहिन बनेको थियो। जिल्ला अध्यक्षले प्रदेशबाट आमन्त्रित नेताहरुलाई अतिथिको रुपमा तटस्थ अभिभावकीय भुमिका निर्वाह गर्न आग्रह गरेका थिए ।

हिजो बन्दसत्र सुरु भएर बन्दसत्रको अध्यक्ष मण्डलको अध्यक्षमा देवकोटालाई स्वीकार गर्न नसकिने र अध्यक्ष मण्डलको नेतृत्व गुरु बराललाई दिनुपर्ने माग गर्दै होहल्ला गरेका हुन् ।

पार्टी अध्यक्ष भुमी त्रिपाठीले अध्यक्ष मण्डलको नाम घोषणा गरे लगतै गंगादेवी श्रेष्ठ बोलिरहेको माइक तान्न पुगेकी थिइन् ।
त्यसपछि प्रदेश कमिटीका सदस्य रमेश आचार्य, जिल्ला उपसचिव हरिराम लोहनी, जिल्ला सदस्य नेत्र नेपाललगायतले अन्य प्रतिनिधिहरुलाई उठेर विरोध गर्न संकेत गरेपछि मुठभेटको अवस्था सिर्जना भएको एक प्रतिनिधिले बताए ।

करिव डेढ घण्टासम्म चलेको हुलहुज्जतको समयमा अध्यक्षका आकांक्षी डा.रामकुमार अधिकारी समेत रोस्ट्रममा रहेको माइक तान्न पुगेका थिए ।

अध्यक्ष मण्डलको नेतृत्व गुरु बराललाई सुम्पिएर अधिवेशनको समय लम्ब्याउँदै कमिटी कब्जा गर्ने तयारी गरेको र त्यो सम्भव नभए अनन्तसम्म कमिटी विहिन बनाउन उद्दित रहेको प्रतिनिधिहरुको बुझाई छ ।

बन्दसत्र सुरु हुन नसकेकोमा आक्रोश व्यक्त गर्दै प्रतिनिधिहरुले छिटो प्रक्रिया अगाडि बढाउन माग गरेका छन् । जिल्लाको आन्तरिक मामिलामा माथिल्लो तहको हस्ताक्षप भएको भन्दै नेतृत्व विरुद्ध नारावाजी समेत गरेका थिए ।

आफ्नो नेतृत्व आफै छान्न पाउन्र माग राख्दै प्रतिनिधिहरुले तत्काल प्रक्रिया सुरु गरेर प्राप्त परिणामलाई स्वीकार गर्न आग्रह गरेका छन् ।