मुलुकको आर्थिक विकासको आमुल परिवर्तनको लागि एमाले आवश्यक : भट्टराई

धादिङ । नेकपा (एमाले) का स्थायी कमिटी सदस्य एवं विदेश विभाग प्रमुख राजन भट्टराईले मुलुकको आर्थिक विकासको आमुल परिवर्तनको लागि एमाले आवश्यक रहेको बताउनुभएको छ ।

शुक्रबार धादिङको गजुरीस्थित एमाले गजुरी गाउँपालिका कमिटिको दोश्रो अधिवेशन उद्घाटनसत्रलाई सम्बोधन गर्दै भट्टराईले मुलुकको राष्ट्रियता र लोकतन्त्रको संरक्षण गर्दै आर्थिक विकासको आमुल परिवर्तनको लागि एमाले नै आवश्यक रहेको बताउनुभएको हो ।

उहाँले अप्राकृतिक गठबन्धन भत्काएर बनेको अहिलेको सत्ता समीकरणले भविष्यका लागि जनतामा आशाको संकेत गएकोले एमालेका कारण अहिलेको सत्ता समिकरण नबिग्रिने बताउनुभयो ।

भट्टराईले समान रणनीतिक लक्ष्य र कार्यदिशा अपनाएका वामपन्थी पार्टीहरू एउटै समीकरण बनाएर अघि बढ्नु प्राकृतिक र स्वाभाविक विषय भएको प्रष्ट पार्नुभयो ।

उहाँले भन्नुभयो, ‘सरकार निर्माण गर्दा भएको जुन न्यूनतम साझा कार्यक्रममा सहमति भएको छ, त्यसैलाई आधार बनाएर इमानदारीसाथ अघि बढ्ने हो भने देशका लागि धेरै राम्रा काम गर्न सकिने पर्याप्त सम्भावना र आधार छन् ’, भट्टराइले भने–‘स–साना दलगत, गुटगत र निजी स्वार्थबाट माथि उठेर काम गर्ने हो भने ०८४ को निर्वाचनसम्म पुग्न नसक्ने कारण छैन ।’

नेता भट्टराइले संकटग्रस्त अर्थतन्त्रमा सुधार ल्याएर मुलुकलाई आर्थिक विकास र सुशासनको बाटोतर्फ उन्मुख गराउन एमालेले महत्वपूर्ण भूमिका निर्वाह गर्न जरुरी रहेको पनि बताउनुभयो ।

चौतर्फी रुपमा बढेको भ्रस्टाचारका गतिविधिलाई नियन्त्रण गरेर देशलाई सुशासनको बाटोतर्फ हिँडाउन एमालेको संगठन बलियो, सक्षम र कामकाजी बनाउनुपर्ने सुझाव दिनुभयो ।

आफ्नो पालिका, जिल्ला र भुगोलको विकास र समृद्धिको पहल एमालेले गर्नुपर्ने भन्दै उहाँले ‘विकास र समृद्धिको एजेण्डा एमालेको हुनुपर्ने बताउनुभयो । शुक्रबारबाट सुरु भएको एमाले गजुरी गाउँपालिका कमिटिको दोश्रो अधिवेशनले नयाँ कार्यसमिति चयन गर्नेछ।