धादिङ आएर पर्यटन मन्त्री पाण्डेले भने,‘एमालेसङ्ग सहकार्य र प्रतिस्पर्धा दुबै हुन्छ’

धादिङ। नेपाल सरकारका संस्कृति, पर्यटन तथा नागरिक उड्डयन मन्त्री एव नेपाली कांगेसका केन्द्रीय सहमहामन्त्री बद्री पाण्डेले नेकपा एमालेसँग सहकार्य र प्रतिस्पर्धा दुबै हुने बताउनुभएको छ।

शनिबार राष्ट्रिय लोकतान्त्रिक अपाङ्ग संघ धादिङको दोश्रो जिल्ला अधिवेशन उद्घाटन कार्यक्रमलाई सम्बोधन गर्दै मन्त्री पाण्डेले नेपाली कांगेसको मुल प्रतिस्पर्धी नेकपा एमालेसँगको गठबन्धन अवसर र चुनौती दुवै रहेको बताउनुभयो ।

मन्त्री पाण्डेले २०८४ सम्म यहि गठबन्धनमा सहकार्य हुने भन्दै सुशासन, भ्रष्टचार न्युनिकरण र सरकारलाई स्थायित्व दिन गठबन्धन आवश्यक रहेको बताउनुभयो ।

उहाँले संस्कृति, पर्यटन र नागरिक उड्डयन क्षेत्रलाई चलायमान बनाउने गरी सरकारले काम गरिरहेको बताउनुभयो।

नेपालको पर्यटन क्षेत्रमा ठूलो लगानीसँगै लाखौं पर्यटकहरु भित्र्याउनुपर्ने भन्दै उहाँले हामीसँग जोडिएका संस्कृति, पर्यटन र नागरिक उड्डयन क्षेत्रलाई चलायमान बनाउने दिशामा हामी तत्परताका साथ लागिरहेको बताउनुभयो।