सिद्धलेकका ६६ जना खेलाडी प्रशिक्षित

धादिङ । सिद्धलेक गाउँपालिका वडा नं ४ स्थित जलेश्वरी माविमा खेलकुद प्रशिक्षण कार्यशाला सम्पन्न भएको छ ।

जलेश्वरी खेलकुद बिभागको आयोजना तथा सिद्धलेक गाउँपालिकाको वडा नं ४ को प्रायोजनमा सञ्चालित पाँच दिने खेलकुद प्रशिक्षण कार्यशाला सोमबार सम्पन्न भएको हो ।

विभिन्न तिन खेलको प्रशिक्षण कार्यशालाबाट ६६ जना खेलाडीहरु प्रशिक्षित भएका छन् ।

कबड्डी, एथलेटिक्स र भलिबलका प्रशिक्षण तालिम समावेश कार्यशालामा सिद्धलेक ४ को तिन वटा मावि क्रमशः जलेश्वरी, पञ्चमुखी र कालिदेवी माविका खेलाडीहरु सहभागी थिए ।

कबड्डी तथा एथलेटिक्स तर्फका खेलाडीहरुलाई बिनोद थापा मगरले प्रशिक्षण गर्नुभएको थियो भने भलिबल तर्फका खेलाडीहरुलाइ सोमबहादुर श्रेष्ठ, दिलिप थापा मगर र ठम बहादुर थापा (सन्दीप) ले प्रशिक्षण गर्नुभएको जलेश्वरी माविका शिक्षक सुरेश अर्यालले जानकारी दिनुभयो ।

सहभागी खेलाडीहरुलाई सोमबार गाउँपालिका अध्यक्ष परशुराम खतिवडाले प्रमाण पत्र वितरण गर्नुभएको थियो ।