असोज १७ देखी खुल्ला फुटसल फिभर

काठमाडौं । एलिसन स्पोर्टस् प्रा.लिको आयोजनामा काठमाडौंमा खुल्ला फुटसल फिभर हुने भएको छ ।

चाबहिलको चुच्चेपाटीस्थित भाटभटेनी हेल्थ क्लबमा रहेको फुटसलमा असोज १७ र १८ गते फुटसल फिभर–२०८१ हुने भएको हो ।

बडा दशैंको अवसर पारेर प्रथम खुल्ला फुटसल फिभरको आयोजना गर्न लागिएको एलिसन स्पोर्टस्की निर्देशक एलिना मगरले जानकारी दिनुभयो ।

प्रतियोगितामा विजयी टिमले नगद ५५ हजार ५ सय ५५ रुपैयाँ र द्धितिय टिमले नगद २५ हजार ५ सय ५५ रुपैयाँ साथै मेडल, ट्रफी र प्रमाणपत्र हात पार्नेछन् ।

यसैगरी उत्कृष्ट खेलाडी र उत्कृष्ट गोल किपरले जनही नगद २ हजार ५ सय ५५ रुपैयाँ रकम, मेडल र प्रमाणपत्र प्राप्त गर्ने निर्देशक एलिना मगरले जानकारी दिनुभयो।

फिभरमा ३२ टिम सहभागी हुने अपेक्षा राखेको र टिम दर्ता शुल्क ६ हजार ५ सय ५५ रुपैयाँ तोकिएको निर्देशक मगरले बताउनुभयो ।

पछिल्लो समय देशमा फुटसलको चासो बढ्दै गएको र युवापुस्तामा अझ यसको लगाव बढिरहेकाले स्पोर्टस्ले फुटसलको आयोजना गरेको एलिसन स्पोर्टस्का प्रबन्धक सगुन थापा मगरले बताउनुभयो ।

आगामी दिनमा खेलाडी तथा युवाहरुलाई खेलकुदमा जागरुक गराउन एलिसन स्पोर्टस्ले विभिन्न खेल प्रतियोगिताको आयोजना गर्ने पनि बताउनुभएको छ।