धादिङकी एरिका गुरूङ राखेपको वर्ष उत्कृष्ट खेलाडी

अडियोमा सुन्नुहोस

काठमाण्डौ । धादिङकी एरिका गुरूङ राखेपको वर्ष उत्कृष्ट खेलाडी अवार्डबाट सम्मानित हुनुभएको छ ।

राष्ट्रिय खेलकुद परिषद (राखेप) को ६१ औँ वार्षिकोत्सवमा करातेकी एरिका गुरूङ वर्षका उत्कृष्ट खेलाडी अवार्डबाट सम्मानित हुनुभएको हो ।

एरिकासँगै टेबल टेनिसका स्यान्टु श्रेष्ठ पनि वर्षका उत्कृष्ट खेलाडी अवार्डबाट सम्मानित हुनुभएको छ ।

भद्रकालीमा रहेको आर्मी अफिसर्स क्लबमा हिजो भएको कार्यक्रममा प्रधानमन्त्री केपी शर्मा ओलीले अवार्ड दिनुभएको छ ।

एरिका र स्यान्टु दुवैले समान १ लाख रुपैयाँ प्राप्त गर्नुभयो ।

धादिङको नीलकण्ठ नगरपालिका–१३ लाहुरे गाउँकी एरिकाले गएको वर्ष चीनको हाङजाउमा भएको १९औँ एशियाली खेलकुदमा ऐतिहासिक रजत पदक जित्नुभएको थियो ।

त्यस्तै उहाँले १०औँ सितोरियो कराते विश्व च्याम्पियनसिपमा स्वर्ण जित्नुभएको थियो ।

स्यान्टु पेरिस ओलम्पिक्समा छनोट हुने तेस्रो नेपाली खेलाडी हुनुहुन्छ।अहिले स्यान्टु अष्ट्रेलियामा रहेको कारण उहाँको बुवाले अवार्ड ग्रहण गर्नुमयो।

वर्ष उत्कृष्ट पारा खेलाडीको अवार्डबाट पलेशा गोवर्धन सम्मानित हुनुभएको छ ।

पलेशाको अभिभावक र प्रशिक्षक कविराज नेगी लामालाई पनि सम्मान गरिएको छ ।

यस्तै वर्ष उत्कृष्ट महिला जुनियर खेलाडीबाट एथलेटिक्सका देवकी कुमारी धामी र वर्ष उत्कृष्ट पुरूष जुनियर खेलाडीबाट क्रिकेटका दिपेश कडेल सम्मानित हुनुभएको छ।

नेपाल कराते महासङ्घ उत्कृष्ट सङ्घ बनेको छ । खेल पत्रकारिता अवार्डबाट अनिल मल्ल ठकुरी र नमिता दाहाल सम्मानित हुनुभएको छ । तस्बिर :राष्ट्रिय खेलकुद परिषद