धादिङकी एरिका गुरूङ एनएसजेएफ स्पोर्ट्स अवार्डको वर्ष उत्कृष्ट खेलाडी

काठमाण्डौ । धादिङकी एरिका गुरुङ नेपाली खेलकुद पत्रकार मञ्च (एनएसजेएफ) स्पोर्ट्स अवार्ड–२०८० को वर्ष उत्कृष्ट खेलाडी बन्न सफल हुनुभएको छ।

शुक्रबार एनएसजेएफले गरेको कार्यक्रममा महिलामा करातेकी एरिका र पुरुषमा नेपाली राष्ट्रिय क्रिकेट टोलीका कप्तान रोहितकुमार पौडेल वर्ष उत्कृष्ट खेलाडी हुनुभएको हो ।

१९औँ एशियाली खेलकुद (एशियाड मा रजत पदक विजेता एरिकाले फुटबलकी सावित्रा भण्डारी, क्रिकेटकी रुविना क्षेत्री, एथलेटिक्सकी सन्तोषी श्रेष्ठ र कबड्डीकी मेनुका राजवंशीलाई पछि पार्नुभयो ।

धादिङको नीलकण्ठ नगरपालिका–१३ लाहुरे गाउँकी एरिकाले गएको वर्ष चीनको हाङजाउमा भएको १९औँ एशियाली खेलकुदमा ऐतिहासिक रजत पदक सँगै १०औँ सितोरियो कराते विश्व च्याम्पियनसिपमा स्वर्ण जित्नुभएको थियो ।

यसअघि राष्ट्रिय खेलकुद परिषद (राखेप) को ६१ औँ वार्षिकोत्सवमा एरिका गुरूङ वर्षका उत्कृष्ट खेलाडी अवार्डबाट सम्मानित हुनुभएको थियो।

त्यस्तै पुरुष क्रिकेट टोलीका कप्तान रोहितले क्रिकेटकै दीपेन्द्रसिंह ऐरी, करातेका मोहम्मद सेखु आलम, फुटबलका अनन्त तामाङ र गल्फका सुवास तामाङलाई पछि पार्नुभएको हो।

त्यस्तै भलिबलकी कविता भट्टले पिपुल्स च्वाइसको अवार्ड जित्नुभएको छ ।

एनएसजेएफ पारा एथलिट अवार्डबाट पलेशा गोवर्धन सम्मानित हुनुभयो। पलेशा चौथो पारा एसियन गेम्समा नेपालका लागि पहिलोपल्ट कांस्य पदक दिलाउन सफल खेलाडी हुन् ।

नेपाल खेलकुद पत्रकार मञ्च (एनएसजेएफ) स्पोर्ट्स अवार्ड–२०८० अन्तर्गत ‘टिम अफ दी ईयर’को अवार्ड राष्ट्रिय महिला कबड्डी टोलीले जितेको छ । तस्बिर:सामाजिक सञ्जाल