सिद्धलेक नलाङमा भएको भलिबलमा गण्डकी गाउँपालिका प्रथम,कति पाए पुरस्कार राशी ?

धादिङ । सिद्धलेक गाउँपालिका–२ नलाङस्थित खिर्रेभञ्याङमा भएको पालिकास्तरीय भलिबल प्रतियोगिता गोरखाको गण्डकी गाउँपालिकाले जितेको छ ।

खिर्रेस्थित नलाङ पात्ले मा.विको खेल मैदानमा आज भएको फाईनल खेलमा गण्डकी गाउँपालिकाले धादिङको ज्वालामुखी गाउँपालिकालाई सोझो सेटमा हराउँदै प्रथम स्थान हासिल गरेको हो ।

उक्त फाइनल खेल गण्डकीले ज्वालामुखीलाई २५–१३, २५–१५ र २५–२२ को सोझो सेटमा पराजित गरेको हो ।

प्रतियोगितामा प्रथम भएको गण्डकीले नगद १ लाख ११ हजार १११ सहित ट्रफी, मेडल र प्रमाणपत्र पाएको छ भने द्धित्तिय स्थान हासिल गरेको ज्वालामुखीले नगद ५५ हजार ५५५ सहित ट्रफी, मेडल र प्रमाणपत्र पाएको छ ।

यसैगरी दुप्चेश्वर गाउँपालिका नुवाकोटले धादिङ सिद्धलेकको मनकामना समाज सुधार युवा क्लवलाई पराजित गर्दै तेस्रो स्थान हासिल गरेको छ।

दुप्चेश्वरले पुरस्कार नगद ३३ हजार ३३३ सहित ट्रफी, मेडल र प्रमाणपत्र पाएको छ।सान्तवना भएको मनकामनाले नगद ११ हजार १११ सहित मेडल र प्रमाणपत्र पाएको छ ।

यस्तै बिधागत तर्फ उत्कृष्ट खेलाडी गण्डकीका सरोज बर्देवा, उत्कृष्ट स्पाइकर ज्वालामुखीका सरन सामरी क्षेत्री, उत्कृष्ट ब्लकर ज्वालामुखीकै सनोज चौधरी, उत्कृष्ट सेटर गण्डकीका विवश आले, उत्कृष्ट सर्भर दुप्चेश्वरका राजिव कडेल, उत्कृष्ट लिब्रो गण्डकीका राजन दर्लामी मगरले मेडल र प्रमाणपत्र पाएका छन् ।

बिजेता टिम र खेलाडीहरुलाई बागमती प्रदेशका मुख्यमन्त्री बहादुरसिं लामा, बागमती प्रदेश सांसद गोविन्द लम्साल, सिद्धलेक गाउँपालिका अध्यक्ष परशुराम खतिवडाले पुरस्कार वितरण गर्नुभएको थियो ।

कार्यक्रममा बोल्दै मुख्यमन्त्री लामाले आगामी दिनमा सिद्धलेकमा खेलकुदको विकासको लागि आफ्नो तर्फबाट सक्दो सहयोग गर्ने बताउनुभयो ।

तमु युवा समाज सिद्धलेक–२ धादिङको आयोजना तथा सिद्धलेक गाउँपालिकाको प्रायोजनमा स्व.लोक बहादुर गुरुङ र स्व.मनोज श्रेष्ठ स्मृती कप खुल्ला पालिका स्तरिय पुरुष भलिबल प्रतियोगितामा धादिङ, नुवाकोट र गोरखाका गरी ९ टिम सहभागी थिए ।

प्रतियोगिता आईतबारदेखी सुरु भएको थियो ।

तमु युवा समाजले हरेक बर्ष दशैको अवसरमा खिर्रेमा भलिवल प्रतियोगिता आयोजना गर्दै आएको छ । यस बर्ष भने स्व.लोक बहादुर गुरुङ र स्व.मनोज श्रेष्ठ स्मृती कप आयोजन गरेको हो ।

तमु युवा समाजका सल्लाहकार, तमु ह्युल छोज धी गुरुङ राष्ट्रिय परिषद सिद्धलेकका अध्यक्ष एवम नलाङ पात्ले माविका पूर्व व्यवस्थापन समिति अध्यक्ष तथा नलाङको साविक वडा नं ४ का वडा अध्यक्ष समेत रहेका लोक बहादुर गुरुङको गत असार ६ गते खिर्रेमा सवारी दुर्घटनामा परी निधन भएको थियो।

यस्तै धादिङ जिल्ला भलिबलको टिम क्याप्टेन स्व.मनोज श्रेष्ठको गत बर्ष नलाङस्थित खिर्रेभञ्याङमा आयोजित भलिबल प्रतियोगिताकै समयमा निधन भएको थियो।टिपटप हेल्प नेपालबाट प्रधानमन्त्री कप एनभीए समेत खेलेका श्रेष्ठको कप्तानीमा धादिङले बागमती प्रदेश स्तरिय प्रतियोगिता समेत जितेको थियो ।

प्रतियोगिताको थप फोटो र लाई प्रशारण भएको भिडियो हेर्नको लागि तलको लिंकमा क्लिक गर्नुहोस्

https://www.facebook.com/kalambagmati