काभा भलिबल क्लब च्याम्पियनशिपको उपाधिका लागि आज हेल्प नेपाल र भारतको क्यालिकटले खेल्ने

काठमाण्डौ । काभा पुरुष भलिबल क्लब च्याम्पियनशिपको उपाधिका लागि नेपालको हेल्प नेपाल स्पोर्ट्स क्लब र भारतको क्यालिकट हिरोजले खेल्ने भएका छन् ।

फाइनल खेल आज दिउँसो साढे ४ बजे त्रिपुरेश्वरमा रहेको राष्ट्रिय खेलकुद परिषद् (राखेप) को कभर्ड हलमा हुनेछ ।

हिजो भएको सेमिफाइनलमा माल्दिभ्सको क्लब एचडीसीलाई ३–० को सोझो सेटमा हराउँदै हेल्प नेपालले भारतको क्यालिकट हिरोजसँगको फाइनल भेट पक्का गरेको हो ।

हेल्प नेपालले पहिलो सेट २५-१६, दोस्रो सेट २५-१८ र तेस्रो सेट २५-२१ ले जित्यो ।

त्यसअघि इरानको १८ वर्षमुनिको टोलीलाई ३–१ ले हराउँदै क्यालिकट च्याम्पियनशिपको फाइनलमा पुगेको थियो । इरानको युवा टोलीले पहिलो सेट २५–२१ ले जित्यो ।

क्यालिकट हिरोजले दोस्रो सेट २५–२२, तेस्रो सेट २५–२० र चौथो सेट २६–२४ ले जित्यो ।