धादिङमा आयुर्वेदिक स्वास्थ्योपचार सेवा लिने बढे, तर भौतिक पूर्वाधार र जनशक्तिको अभाव

धादिङ । धादिङमा आयुर्वेदिक स्वास्थ्योपचार सेवाप्रति नागरिकको विश्वास बढ्दै गएको छ ।

आयुर्वेदिक उपचार प्रभावकारी भई बिरामीले लाभ लिन थालेपछि सदरमुकाम धादिङबेसीमा रहेको आयुर्वेद तथा वैकल्पिक चिकित्सालय धादिङसँगै जिल्लाका बिभिन्न स्थानमा रहेको नागरिक आरोग्य सेवा केन्द्र र आयुर्वेद औषधालयबाट सेवा लिनेहरु बढेका छन् ।

जिल्लामा पछिल्लो समय आयुर्वेदिक उपचारतर्फ आकर्षण बढ्दै गएको आयुर्वेद तथा वैकल्पिक चिकित्सालय धादिङका प्रमुख डाक्टर अमुल्य दाहालले बताउनुभयो ।

आयुर्वेद तथा वैकल्पिक चिकित्सालयले शुक्रबार धादिङबेसीमा आयुर्वेद सेवाको प्रवर्धन गर्न पत्रकारहरुसँग अन्तरक्रिया गर्नुका साथै चालु आर्थिक बर्ष ०८१/०८२ को बार्षिक कार्यक्रम सार्वजनिक गरेको छ ।

यस बर्ष पथ्य आहार कार्यक्रम, मुख्यमन्त्री जनता स्वास्थ्य कार्यक्रम सञ्चालन, प्रदुषणबाट उत्पन्न स्वास्थ्य समस्या न्यूनीकरण,जानुसन्धीगत वात पुनस्थापना कार्यकम, आयुर्वेद औषधालय, नागरिक आरोग्य सेवा केन्द्रमा स्थलगत अनुशिक्षण, भान्साघर औषधालय कार्यक्रम, महिला स्वास्थ्य स्वयंसेविकालाई आयुर्वेद सम्बन्धी कार्यक्रम, नसर्ने रोगको रोकथाम तथा नियन्त्रणका लागि स्वस्थ जीवन प्रवर्धन कार्यक्रम, स्वास्थ्य पर्यटन प्रवर्द्धनका लागि प्रदेश भित्र रहेका होटलहरुलाई अभिमखिकरण कार्यक्रम सञ्चालन हुने डाक्टर दाहालले बताउनुभयो ।

नीलकण्ठ नगरपालिका–३ स्थित नीलकण्ठ बहुमुखी क्याम्पस अगाडी रहेको यस चिकित्सालय १६ बेडको अस्पतालमा स्तरोन्नति भएपनि आफ्नै भवन नहुँदा सेवा दिन कठिनाई भैरहेको दाहालले बताउनुभयो ।

चिकित्सालयले अब अस्पताल भवन निर्माण गरी थप सेवा प्रदान गर्ने भन्दै अस्पताल निर्माणका लागि जग्गा प्राप्त भईसकेको र सम्भवत यसै बर्ष डिपिआर हुने पनि बताउनुभएको छ ।

केही समय यता चिकित्सालयको विकास समिति नभएका कारण औषधालयमा औषधिको विविधता तथा परिमाण आवश्यकता भन्दा न्यून मात्रै उपलब्ध हुनुले पनि सेवाग्राहीलाई सहज रुपले सेवा दिन अप्ठ्यारो हुने गरेको उहाँको भनाई छ ।

कार्यक्रममा प्रमुख अतिथि प्रमुख जिल्ला अधिकारी सुमन घिमिरेले आयुर्वेद सेवालाई अझै प्रचार प्रसारमा जोड दिनुपर्ने बताउनुभएको छ ।उहाँले स्वस्थ जिवनको सुत्रधारलाई विकास गर्न आवश्यक रहेको भन्दै आफ्नो जिवनशैलीलाई व्यवस्थित गर्नुपर्ने बताउनुभयो ।साथै विकास समितिलाई थप क्रियाशिल बनाउन पनि आग्रह गर्नुभयो ।

कार्यक्रममा नेपाल पत्रकार महासंघका अध्यक्ष सिताराम अधिकारी, जनस्वास्थ्य कार्यालयका प्रमुख डा.विभु कुमार झा लगाएत बिभिन्न सञ्चार माध्यममा आवद्ध सञ्चारकर्मी सहभागी थिए ।

आयुर्वेद औषधालय वैकल्पिक उपचार विधि अन्तर्गत बहिरंग सेवा, प्याथोलोजी ल्याव, अकुपंचर सेवा, पुर्वकर्म र पंचकर्म सेवा, फिजिओथेरापी लगायतको निःशुल्क सेवा प्रदान गर्दै आएको छ ।

मुख्यमन्त्री जनता स्वास्थ्य कार्यक्रम मार्फत ३० वर्ष भन्दा माथिका नागरिकको निःशुल्क स्वास्थ्य परीक्षण गर्दै आएको आयुर्वेद चिकित्सकका सूचना अधिकारी प्रकाश सापकोटाले जानकारी दिनुभयो ।

चिकित्सालयमा अहिले धादिङ र गोर्खाका विभिन्न ठाउँबाट दैनिक २५ जना भन्दा माथि चेकचाँज गर्न विरामीहरु आउने गरेको उहाँले बताउनुभयो ।

जिल्ला आयुर्वेद स्वास्थ्य केन्द्रबाट बिभिन्न २३ प्रकारको आयुर्वेद औषधी निशुल्क पाउने र श-शुल्क फार्मेशीमा बिभिन्न ६७ प्रकारको औषधी पाईने पनि बताउनुभयो। तर अहिले अस्पताल व्यवस्थापन समिति नभएकाले औषधी खरिद पक्रिया रोकिएको बताउनुभयो ।

जिल्ला भर १० वटा आयुर्वेद संस्थाहरू सञ्चालित छन् ।

धादिङबेशीको चिकित्सालय सहित ६ वटा स्थानीय तह सिद्धलेक, नेत्रावती डवजोङ, खनियाबास, ज्वालामुखी गाउँपालिका र धुनिबेशी नगरपालिकामा नागरिक आरोग्य केन्द्र स्थापना गरी सेवा दिन थालिएको छ भने ज्यामरुङ, गजुरी, बैरनी र सेर्तुङमा औषाधालय सञ्चालनमा छन् ।

यस्तै धादिङबेशीमै ३ वटा गैरसरकारी संस्था पनि रहेको छ ।

विश्वको सबैभन्दा पुरानो चिकित्सा पद्धतिका रुपमा रहेको आयुर्वेद चिकित्सा पद्धति मानिन्छ। यसले गर्दा पनि पछिल्लो समय आयुर्वेद उपचारमा धेरैको आकर्षण बढ्दै गएको छ।