हर्पन खोलामा डुबेर धादिङका एक युवकको मृत्यु

धादिङ । कास्कीको पोखरा महानगरपालिका–२३ घाँटीछिनाको हर्पन खोलामा डुबेर धादिङका एक युवकको मृत्यु भएको छ।

त्रिपुरासुन्दरी गाउँपालिका-७ लपाङ घर भई हाल पोखरा महानगरपालिका वडा नं. ८ नागढुंगा बस्दै आएका २५ वर्षीय सन्तोष सिंखडाको मृत्यु भएको जिल्ला प्रहरी कार्यालय कास्कीले जनाएको छ।

मंगलबार दिउँसो करिब २ बजे पोखरा २३ घाँटीछिनास्थित हर्पन खोलामा पौडी खेल्नेक्रममा डुबेर बेपत्ता भएका सिंखडाको मंगलबार दिउँसो ३ः२० बजे शव भेटिएको प्रहरीले जनाएको छ।

घटना पछी वडा प्रहरी कार्यालय बैदाम र सशस्त्र प्रहरी बल नं.२४ हेडक्वाटर कालिकाबाट उद्दार टोलीले खोजी गरेको थियोे ।

सशस्त्र प्रहरीको गोताखोरसहितको विपद् व्यवस्थापन टोलीले झण्डै २० फिट गहिराईबाट उहाँको शव बाहिर निकालेको थियो।

सिंखडाको शव पोखरा स्वास्थ्य विज्ञान प्रतिष्ठानको पश्चिमाञ्चल क्षेत्रीय अस्पतालमा राखिएको र घटनाका सम्बन्धमा आवश्यक अनुसन्धान भइरहेको प्रहरीले जनाएको छ ।

यसअघि काठमाडौँ बस्दै आएका सन्तोष एक सातादेखि पोखरामा बस्दै आएका थिए ।