सिद्धलेक-३ झारलाङ्दीमा हिंसाको अन्त्यका लागि स्थानीय सरकार र सरोकारवालाहरूको भूमिका विषयक अन्तरक्रिया

सिद्धलेक । धादिङको सिद्धलेक गाउँपालिका वडा नं ३ झारलाङ्दीमा घरेलु हिंसा, सामाजिक हिंसा तथा हत्या हिंसा लगायतका विभिन्न घटनाहरुको अन्त्यका लागि स्थानीय सरकार सरोकारवालाहरूको भूमिका विषयक अन्तरक्रिया तथा छलफल गरिएको छ।

लैङ्गिक हिंसा बिरुद्धको १६ दिने अभियान अन्तरगत जलदेवी स्वास्थ्य आमा समूहको आयोजना, जुनेली समाज नेपालको सहयोग तथा सिद्धलेक गाउँपालिका वडा नं ३ को समन्वय तथा सहकार्यमा अन्तरक्रिया गरिएको हो।

कार्यक्रममा गाउँपालिकाका अध्यक्ष परशुराम खतिवडाले पछिल्लो समयमा लैङ्गिक हिंसाका घटनाहरु वृद्धि भइरहेको बताउनुभयो। अध्यक्ष खतिवडाले महिलाको आय स्तरमा वृद्धि गर्नसके घरेलु हिंसा न्यूनिकरण गर्न सहज हुने भन्दै गाउँपालिकाले आय आर्जनको क्षेत्रमा कार्यक्रम सञ्चालन गरिरहेको बताउनुभयो ।

यस्तै गाउँपालिकाका उपाध्यक्ष सविता अर्यालले नेपालको संविधानले सम्पूर्ण नागरिकको स्वतन्त्रता र समानताको अधिकारलाई ग्यारेन्टी गरेको बताउनुभयो ।

मानव अधिकारको विश्वव्यापी घोषणापत्रले पनि हरेक मानिसको स्वतन्त्रतापूर्वक जन्मन, हुर्कन र बाँच्न पाउने अधिकारको ग्यारेण्टी गरेको भन्दै उपाध्यक्ष अर्यालले महिला अधिकार, बाल अधिकार, अपांगता भएका व्यक्तिहरुको अधिकार, आप्रवासीका अधिकार लगायतका अधिकार सुनिश्चित गराउन गाउँपालिकाले विभिन्न कार्यक्रम ल्याएको जानकारी दिनुभयो ।

यसैगरी धादिङका सहायक प्रमुख जिल्ला अधिकारी युवराज अर्यालले बढ्दो वैदेशिक रोजगारी र असुरक्षित आप्रवासनका कारण समाजमा हिंसाका घटना बढेको बताउँदै यसको न्यूनिकरण गर्न सबै सरोकारवालाको ऐक्यवद्धता हुनुपर्ने धारणा राख्नु भयो ।

यस्तै नेपाल पत्रकार महासंघ धादिङका अध्यक्ष राजाराम शर्माले अझैपनि ग्रामीण समाजमा महिला तथा बालिकाहरुलाई कमजोर र दोस्रो दर्जाको नागरिक समान व्यवहार हुने गरेको, धर्म, संस्कार, संस्कृति, रीतिरिवाज आदिका नाममा हानिकारक रीतिरिवाजको प्रचलनका कारण महिला, किशोरी र बालिकामाथिको दमन हुने गरेको भन्दै यसलाई रोक्न सबैको सहकार्य आवश्यक रहेको बताउनुभयो।

कार्यक्रममा सिद्धलेक गाउँपालिका वडा नं ३ का अध्यक्ष देवबहादुर पुलामी, जुनेली समाजका अध्यक्ष जुना राना मगर लगायतले लैंगिक हिंसा अन्त्यको अभियानमा सँधै लाग्ने प्रतिवद्धता जनाउनु भएको थियो ।

कार्यक्रममा सशस्त्र प्रहरी बल आश्रित गुल्म धादिङबेसीका इञ्चार्ज सशस्त्र प्रहरी बल प्रहरी नायव उपरीक्षक लक्ष्मी थपलियाले लैंगिक हिंसा र रोकथामका उपायमा र जिल्ला प्रहरी कार्यालय धादिङका प्रहरी निरिक्षक प्रल्हाद सिलवालले धादिङ जिल्लाको लैंगिक हिंसाको पछिल्ला अवस्था र कारवाहीका विषयमा जानकारी गराउनु भएको थियो।