च्याडुघुम्तीमा फोहोर फाल्न नदिने प्रभावितको चेतावनी,नगरपालिकालाई सात दिने अल्टिमेटम (भिडियोसहित)

धादिङ । नीलकण्ठ नगरपालिका–८ च्याडुघुम्तीको डम्पिङ साइडमा फोहोर फाल्न नदिने चेतावनीसहित प्रभावित क्षेत्रका बासिन्दाले नगरपालिकालाई सात दिने अल्टिमेटम दिएका छन् ।

वर्षाैदेखि अव्यवस्थित ढंगबाट फोहोर फालिदै आएको डम्पिङ साइड व्यवस्थित नगर्दा गाउँसम्म दुर्गन्ध फैलिने क्रम बढेको भन्दै प्रभावित क्षेत्रका बासिन्दाले फोहोर फाल्न रोक लगाउने चेतावनीसहित सात दिने अल्टिमेटम दिएका हुन् ।

बुधबार स्थानीय ससाह ज्यामिरे सामुदायिक वन उपभोक्ता समूहले नगर उपप्रमुख दिपक विश्वकर्मालाई सात दिने अल्टमेटमसहितको ध्यानाकर्षण–पत्र बुझाएका छन्।

दैनिक दुई देखि तीन गाडी फोहोर फालिदै आएको डम्पिङ साइड व्यवस्थित नभएको वन समूहका अध्यक्ष रामकुमार पौडेलले बताउनुभयो ।

वन समुहका सचिव शंकर श्रेष्ठले फोहोरले प्रभावित क्षेत्रका नागरिकले २४सै घण्टा दुर्गन्ध त सहनु परेको छ नै घरपालुवा वस्तुभाउ चराउन र वन क्षेत्रमा घाँसदाउरा गर्न जान समेत नसकिने अवस्था आएको बताउनुभयो ।

उहाँले भन्नुभयो, ‘च्याडुघुम्तीमा विगत २० वर्षदेखि धादिङबेसी बजारको फोहोर फाल्दै आएको र त्यस ठाउँमा हालसम्म व्यवस्थित नबनाई फालिएको फोहोरले कालुपाण्डे मार्गमा यात्रा गर्ने यात्रुले समेत दुर्गन्ध सहन बाध्य छन्,ससाह ज्यामिरे आसपासबाट मात्रै होइन ढोला, मैदी नलाङ क्षेत्रबाट समेत मानिसको मृत्युपछि अन्तिम दाहसंस्कारका लागि शव लाने बाटो त्यहि भएको र फोहोरको ढंगुरमाथी फुटेका सिसा, प्लाष्टिकका कचेरा र सडेका फोहोरमाथी टेक्दै शव बोक्नुपर्ने बाध्यता छ ।’

अब यहाँका नागरिकले यो सब सहेर बस्न नसक्ने भन्दै सचिव श्रेष्ठले मानवताविरोधी अपराध गरेकाले अबउप्रान्त सधैँका लागि फोहोरमैला निषेध गर्नुबाहेक अर्काे विकल्प नभएको बताउनुभयो ।

‘स्थानीय सरकारहरुले हाम्रा गुनासो सुनुवाई नगरी जबरजस्ती फोहोर फाल्ने काम बन्द नगरे फोहोरमैला बोकेका गाडीलाई प्रभावित क्षेत्रमा प्रवेश निषेध गरी चरणबद्ध आन्दोलन गर्न बाध्य हुनेछौं’ श्रेष्ठले भन्नुभयो ।यदि अझै पनि प्रभावित क्षेत्रका नागरिकको गुनासोलाई व्यवस्था गरी आजको मितिबाट सात दिनभित्र फोहोर फाल्ने काम बन्द नगरे र फालिसकिएको फोहोरको सहि तरिकाले व्यवस्थापन नगरी बलमिचाई ढंगबाट फोहोर फाल्ने काम भयो भने फोहोर बोकेर गएको गाडी फर्काएर बजारभित्र चोकचोकमा फोहोरको डंगुर लगाइदिने सहित कडा आन्दोलनमा उत्रने श्रेष्ठको भनाई छ ।

निरन्तर फालिएको फोहोरले त्यस क्षेत्रको वन पैदावर पनि नास हुँदै गएको र नागरिकको स्वास्थ्यमा पनि प्रतिकुल असर परेको हुँदा नागरिकको जिउधनको रक्षाका लागि फोहोर फाल्न अवरोध गरिने स्थानीय रमेश कोइरालाले बताउनुभयो ।

नगर प्रमुखमा निर्वाचित हुनु अघि च्याडुमा फोहोर डम्पिङ गर्ने विषयमा चर्किएर विरोध गर्ने नगर प्रमुख भिम प्रसाद ढुंगाना अहिले आफु कार्यान्वयन तहमा पुगेपछि केही गर्न नसकेको कोइरालाको भनाई छ ।

ध्यानाकर्षण पत्र बुझ्दै नगर उपप्रमुख दिपक विश्वकर्माले डम्पिङ साइडलाई व्यवस्थित गर्न नगरपालिकाले यसअघि नै विभिन्न ठाउको निरिक्षण गरि पहल भइ रहेको तर कार्यान्वन पक्षमा ल्याउन ढिलाई भएको बताउनुभएको छ ।

अव्यवस्थित ढंगबाट थुपारिएको फोहोले मानवीय स्वास्थ्यमा प्रतिकूल असर परेको तथा राज्यशक्तिको दुरुपयोग गरी स्वच्छ वातावरण बाँच्न पाउने नागरिकको मौलिक हक सरकारले नै हनन् गरेको स्थानीयको आरोप छ ।

सदरमुकाम धादिङबेसीबाट निस्कने फोहोर २० वर्ष भन्दा अगाडिदेखि च्याडुघुम्तीको डम्पिङसाइडमा फालिदै आएको छ । उक्त क्षेत्र नगर प्रमुख ढुंगानाको जन्मस्थल रहेको वडा हो ।

भिडियो…………