नौबिसे-मलेखु सडक आजदेखि राति बन्द गरिने

धादिङ। पृथ्वी राजमार्गअन्तर्गत धादिङको नौबिसे-मलेखु सडक खण्ड आजदेखि राति बन्द गरिदै छ ।

पुलको बिम राख्ने कार्यको लागि आजदेखी १५ दिन (साउन ९ गतेसम्म) का लागि राति बन्द गरिने नागढुंगा–मुग्लिङ सडक योजना (पुर्वी खण्ड) गजुरीले जनाएको छ ।

राति १० बजेदेखि बिहान ३ बजेसम्म राजमार्ग बन्द गरेर पुलको बिम राख्ने आयोजनाको पूर्वी खण्डका सिनियर डिभिजन इन्जिनियर ईश्वरबहादुर रिजालले जानकारी दिनुभयो ।

गणेश खोला, डाङडुङ खोला, खेस्टे खोला र पोखरे खोलाको पुलको गडर लन्चिङ (बिमलाई उचालेर पुलमा राख्न) लागिएको र त्यस बेला हुनसक्ने जोखिमलाई मध्यनजर गरेर सडक राति बन्द गर्न लागिएको उहाँले बताउनुभयो ।

दिउँसोको समयमा गाडीको चाप बढी हुने भएकाले रातिको समयमा पाँच घण्टा सवारी आवागमन बन्द गरेर काम गर्न लागिएको हो ।पुलको आरसिसी बिम पुलभन्दा बाहिरको जमिनमा बनाइएको र त्यसलाई क्रेनले उचालेर पुलको दुवैतर्फको पिल्लरमा राख्नुपर्ने भएकाले सवारी रोकेर काम गर्न लागिएको बताउनुभयो ।

राति एम्बुलेन्स र सुरक्षा निकायले प्रयोग गर्ने सवारी साधनबाहेक अन्य सवारी साधनलाई पूर्णरुपमा रोकिनेछ।

सम्पूर्ण चालकलाई आफ्नो लेनमा अनुशासन कायम राख्न र जथाभावी ओभरटेक नगर्न जिल्ला प्रहरी कार्यालय धादिङले सूचना जारी गरेको छ।

राजमार्ग भएर यात्रा गर्ने सवारी साधनलाई वैकल्पिक मार्गको रुपमा गल्छी-विदुर-छहरे-टोखा सडक प्रयोग गर्न जिल्ला प्रहरी कार्यालयले आग्रह गरेको छ।

जिल्ला प्रहरी कार्यालय धादिङले जारी गरेको सूचना

नागढुंगा–मुग्लिङ सडक योजना(पुर्वी खण्ड) गजुरीले जारी गरेको सूचना