यस्तो छ,काभा पुरुष भलिबल क्लब च्याम्पियनसिपको ट्रफी

काठमाडौं । यही मंसिर २३ गतेदेखि सुरु हुने काभा पुरुष भलिबल क्लब च्याम्पियनसिपको ट्रफी सार्वजनिक गरिएको छ

बुधबार एक कार्यक्रम गरी राष्ट्रिय खेलकुद परिषद् (राखेप) का सदस्य सचिव टंकलाल घिसिङले ट्रफी सार्वजनिक गर्नुभएको हो।

त्रिपुरेश्वरस्थित राखेपको कभर्डहलमा हुने प्रतियोगितामा दुई नेपाली र तीन विदेशी गरी पाँच टिम सहभागी हुने छन् ।

नेपालबाट एनभिए लिग विजेता हेल्प नेपाल स्पोर्ट्स क्लब र उपविजेता गण्डकी प्रदेशले सहभागिता जनाउने छन् ।

त्यसैगरी ईरानबाट चादौर मालो क्लब, भारतबाट कालिकट हिरोज र माल्दिभ्सबाट एचडीसी क्लबले सहभागिता जनाउने छन् ।काभा पुरुष क्लब भलिबल पहिलोपटक हुन लागेको हो ।

नेपालमा यस वर्ष आयोजना हुन लागेको यो दोस्रो काभा प्रतियोगिता हो । यसअघि काभा वुमन्स नेसन्स लिग आयोजना भएको थियो ।