अपाङ्गता दिवसमा धादिङमा बहिरा बालबालिकाबीच मनोरञ्जनात्मक खेलकुद प्रतियोगिता

धादिङ। ३३औं अन्तराष्ट्रिय अपाङ्गता दिवसको अवसरमा धादिङमा बहिरा बालबालिकाबीच मनोरञ्जनात्मक खेलकुद प्रतियोगिता आयोजना गरिएको छ।

दिवसको अवसरमा सशस्त्र प्रहरी बल नेपाल आश्रित गुल्म धादिङ अपाङ्गता भएका बालबालिकाहरुको आत्मविश्वास तथा क्षमता अभिवृद्धि गर्ने उद्देश्यले कार्यक्रमको आयोजना गरेको हो ।

नेपालका विभिन्न जिल्लाबाट धादिङको नीलकण्ठ नगरपालिका–८ स्थित स्वाबलम्वी बहिरा आधारभुत विद्यालयमा अध्ययनरत बालबालिकाबीच गुच्चा चम्चा दौड, बेलुन फुटाई, बिस्कुट खाने जस्ता प्रतियोगिता गरिएको हो ।

कार्यक्रममा प्रमुख जिल्ला अधिकारी सुमन घिमिरेले यस्ता प्रतियोगिताहरूले उनीहरूको क्षमतालाई उजागर गरी समाजलाई थप समावेशी बन्न प्रेरित गर्ने र सिर्जनात्मक क्षेत्रहरूमा अद्भुत योगदान पुर्याउन सहयोग गरेको बताउनुभयो।

यस्तै सशस्त्र प्रहरी बल नेपाल आश्रित गुल्म धादिङकी प्रहरी नायव उपरीक्षक लक्ष्मी थपलियाले बोल्न र सुन्न नसक्ने बालबालिकाहरूको आत्मविश्वास बढाउन तथा प्रतिभा उजागर गर्ने उद्देश्यले प्रतियोगिता आयोजना गरिएको बताउनुभयो।

उहाँले भन्नुभयो,‘बोल्न र सुन्न नसक्ने बालबालिकाको प्रतिभा उजागर गर्दै उनीहरूको आत्मविश्वास अभिवृद्धि गराउने हाम्रो उद्देश्य हो, यो प्रतियोगिताले समावेशीता र समानताप्रतिको सन्देश प्रवाह गर्ने विश्वास छ।’

हातको इसारा तथा संकेतबाट संवाद गर्ने बालबालिकाहरूले खेलमा आफ्ना सपना र साहसलाई रंगीन बनाउँदै जीवनको एक अद्वितीय उत्सव प्रस्तुत गरेका थिए ।

तीन वटै प्रतियोगितामा प्रथम, द्धितीय र तृतीय बालबालिकालाई पुरस्कृत गरिएको छ ।

कार्यक्रमकै अवसर पारेर एक महिनाभित्र जन्मदिन परेका गुल्मका सुरक्षाकर्मीहरु र बुधबार जन्मदिन परेका कार्यक्रममा सहभागी बालबालिकाहरुको सामुहिक जन्मदिन मनाइएको छ।