धादिङ अस्पतालबाट छ महिनामा झण्डै ५१ हजारले लिए सेवा,सेवालाई थप प्रभावकारी बनाईने

धादिङ । सदरमुकाम धादिङबेशीमा रहेको धादिङ अस्पतालबाट ६ महिनाको अवधीमा झण्डै ५१ हजार सेवाग्राहीले सेवा लिएका छन् ।

अस्पतालले चालु आर्थिक बर्षको छ महिना अर्थात साउन देखी पौष महिनासम्म ५० हजार ९ सय ६९ जना सेवाग्राहीलाई सेवा प्रवाह गरेको धादिङ अस्पतालका विक्रम विकले जानकारी दिनुभयो ।

आईतबार अस्पतालले प्रवाह गरेका स्वास्थ्य सेवाहरूको अर्धवार्षिक समिक्षा कार्यक्रममा विकले प्रस्तुतिकरण राख्दै २८ हजार ७९४ जना महिला, २२ हजार १४७ जना पुरुष र अन्य २८ जना गरी ५० हजार ९ सय ६९ जनाले सेवा लिएको बताउनुभयो ।

उहाँका अनुसार ४२ हजार ५ सय ७५ जनाले ओपिडी सेवा, ८ हजार ६ सय ६५ जनाले इमर्जेन्सी सेवा, १ हजार १ सय ८२ जनाले आइपिडि सेवा र १ सय ७ जनाले आइसियू सेवा लिएका छन् ।

यस्तै १ हजार ८ सय ८१ जनाले फिजियो थेरापी, एक सय ८४ जनाले डेन्टल, १ हजार ४७ जनाले डायलाइसिस सेवा लिएका छन्।

१७ हजार ८ सय १५ जनाले ल्याब्ह्रोटरी सेवा, ८ हजार ७ सय १८ जनाले एक्सरे, ३ हजार २ सय ३ जनाले यूएसजी र २ हजार ३ सय ४१ जनाले इसिजी सेवा लिएका छन् ।

कार्यक्रममा अस्पतालले प्रवाह गरेको स्वास्थ्य सेवालाई थप प्रभावकारी बनाउने विषयमा छलफल गरिएको थियो ।

सहभागीहरुले सेवालाई चुस्त बनाउने र सेवाग्राही सन्तुष्ट हुने गरि सेवा प्रवाह गर्नु पर्ने बताएका छन् ।

अस्पतालका निमित्त अस्पताल निर्देशक गगन अधिकारीले अस्पतालले प्रभावकारी सेवा प्रवाह गर्दै आएको र थप परिस्कृत सेवा प्रवाह गर्ने बताउनुभएको छ ।

सिमित श्रोत साधन, जनशक्ति अभावका बाबजुद पनि अस्पतालले प्रभावकारी सेवा प्रवाह गरिरहेको भन्दै विशेषज्ञसहितको सेवा प्रवाहले अस्पतालमा सेवाग्राहीको विश्वास बढको बताउनुभयो ।

त्यस्तै अस्पताल सञ्चालन तथा व्यवस्थापन समितिका अध्यक्ष राधिका सापकोटाले अस्पतालको हरेक शाखाले योजना बनाएर कार्य सम्पादन गर्नुपर्ने बताउनुभयो ।

उहाँले सेवालाई प्रभावकारी र तथ्याङ्कलाई व्यवस्थित गरेर लैजानुपर्ने बताउदै आर्थिक अभाव वा कुनै पनि वहानामा स्वास्थ्य सेवा लिनबाट कोही बञ्चित हुननहुने बताउनुभयो ।

कार्यक्रमको अवसरमा धादिङ अस्पतालले प्रवाह गरेको दैनिक सेवाहरुको नियमित तथा व्यवस्थित तथ्याङ्कहरुको डिजिटल रेकर्डिङ तथा रिपोर्टिङ गर्ने शाखाहरुलाई सम्मान गरिएको छ ।

सम्मानित हुनेहरुमा प्रयोगशाला शाखा, इमर्जेन्सी शाखा र अन्तरंग शाखा(भर्ना शाखा) रहेका छन् ।

वि.सं २०३३ मंसिर २६ गते धादिङ हेल्थ सेन्टरको रुपमा स्थापना भएको धादिङ अस्पताल वि.सं २०४५ सालमा १५ शैयया, वि.सं २०७६ मा ५० शैयया र वि.सं २०८० पौष ३ गते सय शैययामा स्तरोन्नति भएको थियो ।

जिल्लामा रहेको एकमात्र प्रादेशिक अस्पताल धादिङ अस्पतालमा हाल आइसीयु, हेमोडायलाइसिस, आकस्मिक, ओपिडी,प्रसूति, शल्यक्रिया, फिजियोथेरापी, प्रयोगशाला, फार्मेसी, एक्सरे, भिडियो एक्सरे, एआटी, ओसिएमसी, एसएनसियु सेवा बालरोग, हाडजोर्नी, स्त्री तथा प्रसुति रोग, जनरल सर्जरी, इन्टरनल मेडिसिन र एमडीजीपी सहितको विशेषज्ञ ओपिडी सेवा प्रवाह गरिरहेको छ ।

अस्पतालमा अहिले बिशेषज्ञ चिकित्सक,मेडिकल अधिकृत,चिकित्सक र अन्य सेवाका गरी एक सय ५० भन्दा बढि कर्मचारी कार्यरत रहेका अस्पतालका निमित्त निर्देशक डा.अधिकारीले बताउनुभयो ।

सम्मानित हुने प्रयोगशाला शाखा, इमर्जेन्सी शाखा र अन्तरंग (भर्ना शाखा)