कला र साहित्य मौन रहेर होईन,बोलचाल र प्रस्तुतिमा हुनुपर्ने देवकोटाको भनाई

धादिङ । बागमती प्रदेश सरकारका प्रदेश प्रमुख दिपक प्रसाद देवकोटाले कला र साहित्य मौन रहेर होईन, बोलचाल र प्रस्तुतिमा हुनुपर्ने बताउनुभएको छ ।

शुक्रबार धादिङको सदरमुकाम धादिङबेसीमा सुरु भएको ‘बागमती साहित्य महोत्सव २०८१’ को उद्घाटन समारोहलाई सम्बोधन गर्दै देवकोटाले सो कुरा बताउनुभएको हो ।

उहाँले साहित्य प्रेम र करुणा मात्र नभएर न्याय, चेतना, परिवर्तन र रुपान्तरणको उत्प्रेरणा रहेको भन्दै साहित्य क्षेत्रको विकास र प्रवद्र्धनले युवा पुस्तामा देशभक्ति प्रतिको इच्छाशक्ति बढेर जाने बताउनुभयो ।

साहित्य बुझ्न सक्ने राजनैतिक व्यक्तित्व समाज र राष्ट्र हाक्ने असल नायक बन्न सक्ने देवकोटाको भनाई थियो।

देवकोटाले साहित्य र कला, खुसी र समृद्ध जीवनको आधार भएको उल्लेख गर्दै मानवमानवबीचका द्वन्दहरु घटाएर प्रेम, मानवता, एकता र सौहार्दताको बीजारोपण गर्ने महत्वपूर्ण विधा भएको बताउनुभयो ।

इतिहासका कालखण्डमा साहित्यको योगदानलाई बिर्सन नहुने भन्दै उहाँले राणाबिरोधी र पञ्चायत बिरोधी आन्दोलन होस् वा निरंकुशता बिरुद्धका आन्दोलनहरुमा साहित्यिक कलमले चेतना, जागरुकता र आन्दोलनको आँधीबेहरी सृजना गरेको समेत स्मरण गराउनुभयो।

धादिङबेसीमा सुरु भएको साहित्य महोत्सवको बागमती प्रदेश प्रमुख देवकोटाले उद्घाटन गर्नुभएको हो ।

कार्यक्रममा कृषि तथा पशुपन्छी विकास मन्त्री रामनाथ अधिकारीले समाजलाई सही दिशा तर्फ डो¥याउन साहित्यको भुमिका महत्वपुर्ण रहने बताउनुभयो ।

त्यस्तै, नेपाल नगरपालिका संघका अध्यक्ष एवम् नीलकण्ठ नगरपालिकाका नगर प्रमुख भीमप्रसाद ढुंगानाले समाजमा देखापर्ने घटनाहरुलाई समेटेर अभिव्यक्त गर्ने माध्यम नै साहित्य रहेकोले सभ्य समाज निर्माणमा साहित्यको भुमिका महत्वपुर्ण रहेको बताउनुभयो।

महोत्सव उद्घाटनपूर्व शुक्रबार बिहान नेवाः, मगर, गुरुङ, तामाङ, चेपाङ समुदायका संस्कृति झल्कने झाँकी, पन्चैबाजासहितको ¥याली गरिएको छ।

बागमती प्रदेश सरकारको संस्कृति तथा पर्यटन मन्त्रालयको आयोजनामा ‘साहित्य, कला र संस्कृतिको प्रवर्धन, बागमती सभ्यताको सम्बर्धन’ भन्ने मूल मर्मका साथ भएको महोत्सवमा विभिन्न नौ वटा विधामा समूह छलफल, काव्य सन्ध्या, गजल साँझ र गजल प्रशिक्षण रहने महोत्सव व्यवस्थापन तथा सहजीकरण समितिका संयोजक विष्णु आचार्यले जानकारी दिनुभयो।

नीलकण्ठ नगरपालिका–३ धादिङबेसीस्थित नीलकण्ठ बालमन्दिर माविको प्राङ्गणमा सुुरु भएको साहित्य महोत्सव आज समापन हुनेछ।