जनताको विश्वास जितेर काममार्फत प्रमाणित गर्नु मेरो दायित्व हो : रास्वपा उम्मेदवार श्रेष्ठ

धादिङ । धादिङ निर्वाचन क्षेत्र नम्बर २ को रास्वपा उम्मेदवार बोधनारायण श्रेष्ठले जनताको विश्वास जितेर काममार्फत प्रमाणित गर्नु आफ्नो दायित्व भएको बताउनुभएको छ ।

ज्वालामुखी गाउँपालिका वडा नम्बर ४ र ५ मा घरदैलो कार्यक्रमको क्रममा श्रेष्ठले स्थानीय बासिन्दासँग प्रत्यक्ष संवाद गर्दै क्षेत्रको विकास, रोजगारी सिर्जना, शिक्षा र स्वास्थ्य सेवाको पहुँच विस्तारलाई प्राथमिकतामा राख्ने प्रतिबद्धता व्यक्त गर्नुभएको छ ।

उहाँले भन्नुभयो,“चुनाव जित्नु मात्रै मेरो लक्ष्य होइन, जनताको विश्वास जितेर त्यसलाई काममार्फत प्रमाणित गर्नु मेरो दायित्व हो,ज्वालामुखीका हरेक बस्तीमा आधारभूत पूर्वाधार, खानेपानी र कृषि प्रवर्द्धनका कार्यक्रम प्रभावकारी रूपमा अघि बढाइनेछ।”

उहाँले विगतमा जनताले भोग्नुपरेका समस्या दोहोरिन नदिन पारदर्शिता र जवाफदेहितामा आधारित नेतृत्व आवश्यक रहेको उल्लेख गर्दै मतदातालाई विवेकपूर्ण निर्णय गर्न आग्रह गर्नुभयो ।

“अब पुरानै शैलीको राजनीति होइन, परिणाम दिने काम चाहिन्छ,” उहाँले भन्नुभयो ।