बुढिगण्डकी जलविद्युत आयोजनाको काम सुरु हुन अब धेरै महिना कुर्नु नपर्ने सभामुख अर्यालको भनाई

धादिङ । प्रतिनिधि सभाका सभामुख डोल प्रसाद अर्याल (डिपी) ले अब बुढिगण्डकी जलासययुक्त जलविद्युत आयोजनाको काम सुरु हुन धेरै महिना कुर्नु नपर्ने बताउनुभएको छ।

गृह जिल्ला धादिङको भ्रमणका क्रममा नेपाल पत्रकार महासंघले आयोजना गरेको पत्रकार भेटघाट कार्यक्रममा उहाँले सो कुरा बताउनुभएको हो।

उहाँले आयोजनालाई गति दिन सरकारलाई निरन्तर झकझक्याउने र आवश्यक दबाब दिने प्रतिबद्धता समेत व्यक्त गर्नुभयो।

सभामुख अर्यालले आफू पूर्ण रूपमा निष्पक्ष, इमान्दार, जिम्मेवार र तटस्थ रहेर देश र जनताको हितमा नीति निर्माणमा लाग्ने विश्वास व्यक्त गर्नुभयो।

उहाँले आफ्नो प्रमुख प्राथमिकता जनमुखी कानुन निर्माण र प्रभावकारी कार्यान्वयनमा रहने स्पष्ट पार्नुभयो।

संविधान जारी भएको लामो समय बितिसक्दा पनि अझै धेरै महत्त्वपूर्ण कानुनहरू बन्न बाँकी रहेको उल्लेख गर्दै उहाँले बनेका कानुनहरूमा समेत संशोधनको आवश्यकता रहेको बताउनुभयो।

नयाँ कानुन निर्माण र बाँकी रहेका कानुनलाई पूर्णता दिने कार्यलाई प्राथमिकतामा राखिने उहाँको भनाइ थियो। त्यस्तै, जनताले प्रत्यक्ष लाभ पाउने गरी ‘फास्ट ट्रयाक’ बाट कानुन निर्माण प्रक्रिया अघि बढाइने प्रतिबद्धता उहाँले व्यक्त गर्नुभयो।

विकास, समृद्धि र नागरिकको खुसी ढिला नगरी सुनिश्चित गर्नुपर्नेमा जोड दिँदै उहाँले परिणाममुखी काम गर्ने प्रतिवद्धता दोहोर्‍याउनुभयो।

राज्यका हरेक संयन्त्रले नागरिकलाई सरकारको उपस्थितिको अनुभूति गराउनुपर्ने उल्लेख गर्दै सभामुख अर्यालले विकास र सुशासनमा जनताले महसुस गर्ने गरी काम गरिने विश्वास दिलाउनुभयो।