करेन्ट लागेर घाइते भएकी बालिकाको मृत्यु

धादिङ । धादिङको नीलकण्ठ नगरपालिका-४ रायटारमा करेन्ट लागेर घाइते भएकी नीलकण्ठ नगरपालिका-८ की ६ वर्षीया साया श्रेष्ठको मृत्यु भएको छ।

नीलकण्ठ-८ स्थायी घर भएका सुजन श्रेष्ठ र अस्मिता श्रेष्ठकी ६ वर्षीया छोरी साया आइतबार दिउँसो रायटारस्थित एक घरमा खेलिरहेकी थिइन्।

सोही क्रममा उनले चलाएको पोछा लगाउने फलामको डन्डी अचानक नजिकै रहेको विद्युतको हाइटेन्सन लाइनको तारमा ठोक्किन पुगेको थियो।

फलामको डन्डीमार्फत आगोको झिल्कोसहित करेन्ट प्रवाह हुँदा उनी गम्भीर घाइते भएकी थिइन्।

उनलाई उपचारका लागि तत्कालै हेलिकप्टर मार्फत काठमाडौँको कीर्तिपुर बर्न हस्पिटल पुर्‍याइएको थियो।

उनको उपचारकै क्रममा मृत्यु भएको प्रहरीले जनाएको छ ।