सरकारको नीतिप्रति असहमति जनाउँदै धादिङका पत्रकारहरुद्धारा प्रशासनमा धर्ना

धादिङ । धादिङका पत्रकारहरुले प्रेस तथा अभिव्यक्ति स्वतन्त्रता विरोधी सरकारको नीतिप्रति असहमति जनाउँदै जिल्ला प्रशासन कार्यालय धादिङमा धर्ना दिएका छन् ।

नेपाल पत्रकार महासंघ जिल्ला शाखा धादिङको नेतृत्वमा चरणवद्द रुपमा रहेका पत्रकारहरुले बुधबार प्रशासनको मुल गेटमा धर्ना दिएका हुन् ।

जिल्लामा कृयाशिल पत्रकारहरुले प्रशासनको मुल गेटमा एक घण्टा धर्ना दिएका हुन् । धर्नामा पत्रकारहरुले आफ्नो क्यामेरा, डायरी, पेन लगायत सामग्री भुईमा राखेर व्यानरसहित विरोध गरेका थिए ।

नेपाल पत्रकार महासंघ जिल्ला शाखा धादिङका अध्यक्ष सिताराम अधिकारीले पत्रकार महासंघ आन्दोलनकै क्रममा रहेकाले प्रेस स्वन्त्रता विरोधी नीति सरकारले फिर्ता नलिए आन्दोलन थप लम्बिने बताउनुभयो ।

प्रमुख जिल्ला अधिकारी लक्ष्मी पाण्डेले पनि पत्रकारहरुको मागलाई समर्थन गर्दै सहयोग गर्न तयार रहेको बताउनुभयो । जिल्ला प्रशासन कार्यालय धादिङको मूल गेटमा धर्नामा रहेका पत्रकारहरूको माग पूरा गर्न आफूले सक्ने सहयोग गर्ने उहाँको भनाई थियो ।