सिद्धलेक गाउँपालिकाले प्रकाशन गरेको शैक्षिक पात्रोमा विभिन्न त्रुटि: सल्यानको तस्बिरदेखि गलत मितिमा बिदासम्म

धादिङ। धादिङको सिद्धलेक गाउँपालिकाले प्रकाशन गरेको शैक्षिक पात्रो २०८३ मा विभिन्न त्रुटि, विवादास्पद सामग्री र व्यवस्थापकीय कमजोरीका कारण आलोचनाको केन्द्रमा परेको छ।

विद्यालय सञ्चालन, परिक्षा, बिदा र शैक्षिक गतिविधि व्यवस्थापनका लागि तयार गरिनुपर्ने पात्रोमा आधारभूत तथ्य र विवरणमै गल्ती भेटिएपछि यसको उद्देश्यबारे नै प्रश्न उठ्न थालेको छ।

सरोकारवालाहरूले यो पात्रो शैक्षिक व्यवस्थापनका लागि तयार गरिएको दस्तावेज हो कि गाउँपालिका अध्यक्षको प्रचारप्रसारका लागि छापिएको सामग्री हो भन्ने प्रश्न उठाएका छन्।

-सल्यानको तस्बिर, सिद्धलेकको पात्रो

पात्रोको सुरुवाती पानामै सिद्धलेक गाउँपालिकाको पहिचान झल्किने कुनै तस्बिर नराखी सल्यान जिल्लाको ढोरचौर गाउँपालिकाको नक्साको तस्बिर प्रयोग गरिएको पाइएको छ।

आफ्नै गाउँपालिकाको ऐतिहासिक, धार्मिक, सांस्कृतिक तथा प्राकृतिक सम्पदाको तस्बिर राख्न सकिने अवस्थामा अर्कै जिल्लाको तस्बिर प्रयोग गरिनु गम्भीर लापरबाही भएको टिप्पणी गरिएको छ।

-अध्यक्षको फोटो १६ ठाउँमा

शैक्षिक पात्रोमा विद्यालय, विद्यार्थी, शिक्षक, शैक्षिक कार्यक्रम तथा सिकाइसँग सम्बन्धित सामग्रीलाई प्राथमिकता दिनुपर्नेमा गाउँपालिका अध्यक्षको फोटो १६ वटा स्थानमा राखिएको पाइएको छ।

शिक्षा क्षेत्रका सरोकारवालाहरूले शैक्षिक पात्रोमा अध्यक्षको फोटो यति धेरै पटक राखिनुले शैक्षिक उद्देश्यभन्दा व्यक्तिगत प्रचारलाई प्राथमिकता दिएको देखिएको बताएका छन्।

-परीक्षाको अवधि नै गलत

पात्रोमा उल्लेख गरिएको असार महिनाको वार्षिक परीक्षा तालिका ७ दिनको हुनुपर्नेमा ८ दिनको बनाइएको छ।

सामान्य गणना र तालिका व्यवस्थापनमै त्रुटि देखिनुले पात्रो तयार गर्दा पर्याप्त अध्ययन, परीक्षण र पुनरावलोकन नगरिएको आशंका गरिएको छ।

-हरिबोधिनी एकादशीको बिदा गलत महिनामा

पात्रोमा हरिबोधिनी (ठूलो) एकादशीको बिदा मंसिर ४ गते पर्नुपर्नेमा असोज महिनामा उल्लेख गरिएको पाइएको छ।

धार्मिक तथा सार्वजनिक बिदाको मिति नै गलत राखिँदा विद्यार्थी, शिक्षक र अभिभावकलाई भ्रम सिर्जना हुने देखिएको छ।

-असोज महिनाको बिदा नै अस्पष्ट

पात्रोको असोज महिनामा एउटा बिदा उल्लेख गरिएको भए पनि कुन बिदा हो, किन दिइएको हो र त्यसको आधार के हो भन्ने स्पष्ट खुलाइएको छैन।

बिदाको नाम र कारण नखुलाउँदा पात्रो प्रयोगकर्तालाई अन्योल हुने देखिएको छ।

-शिक्षकको बिदा कटौती भएको आरोप

शिक्षकहरूले प्रचलित रूपमा पाउँदै आएको ३० दिनको बिदा पूरा नदिइएको दाबी गरिएको छ।

पात्रोमा शिक्षकहरूको बिदा कटौती गरिएको देखिए पनि त्यसको आधार, कानुनी व्यवस्था वा सम्बन्धित निर्णयबारे कुनै स्पष्ट जानकारी दिइएको छैन।

यस विषयमा शिक्षकहरूले बिदा कटौती गरिएको हो भने त्यसको औचित्य र निर्णय सार्वजनिक गर्नुपर्ने बताएका छन्।

-सार्वजनिक स्रोतको सदुपयोग कि दुरुपयोग ?

शिक्षा शाखाबाट तयार भई सार्वजनिक खर्चमा छापिएको यति महत्वपूर्ण दस्तावेजमा स्थानीय पहिचानसम्बन्धी त्रुटि, सार्वजनिक बिदाको गलत मिति, परीक्षा तालिकाको गणनागत कमजोरी, अस्पष्ट बिदा तथा अध्यक्षको अत्यधिक फोटो समावेश हुनु सामान्य कमजोरी मात्र नभई सार्वजनिक स्रोतको प्रयोगप्रति पनि प्रश्न उठाउने विषय बनेको छ।

सरोकारवालाहरूले करदाताको पैसाले छापिएको शैक्षिक पात्रोको उद्देश्य शैक्षिक व्यवस्थापन, सूचना प्रवाह र विद्यालय सञ्चालनलाई सहज बनाउनु हो कि जनप्रतिनिधिको प्रचारप्रसार गर्नु हो? भन्ने प्रश्नको जवाफ गाउँपालिकाले दिनुपर्ने बताएका छन्।

शिक्षक, अभिभावक र विद्यार्थीहरूले पात्रोमा देखिएका सम्पूर्ण त्रुटिबारे गाउँपालिकाले आधिकारिक स्पष्टीकरण दिनुका साथै आवश्यक सच्याउने प्रक्रिया अघि बढाउन माग गरेका छन्।

🔴हेर्नुहोस् प्रकाशित पात्रो👇️👇️