धादिङबाट जेन–जी आन्दोलनका क्रममा फरार भएका एक बन्दी पक्राउ

धादिङ। जेनजी आन्दोलनका क्रममा केन्द्रीय कारागार सुन्धाराबाट फरार भएका एक बन्दीलाई धादिङ प्रहरीले पक्राउ गरेको छ।

लागूऔषध (खैरो हिरोइन) मुद्दामा कैद सजाय भुक्तान गरिरहेका धादिङको धुनिवेशी नगरपालिका-२ भैटार का ३८ वर्षीय विष्णु बहादुर राईलाई सोही ठाँउबाट आईतबार पक्राउ गरिएको जिल्ला प्रहरी कार्यालय धादिङका सूचना अधिकारी (डिएसपी) प्रकाश दाहाल जानकारी दिनुभयो ।

पक्राउ परेका राईलाई बाँकी कैद सजाय भुक्तानका लागि सोमबार केन्द्रीय कारागार कार्यालय काठमाडौं बुझाइएको प्रहरीले जनाएको छ।

लागूऔषध मुद्दामा दोषी ठहर भएका राईलाई जिल्ला अदालत काठमाडौंले २०८१ माघ १८ गते ५ वर्ष ६ महिना कैद सजाय तथा ५ हजार ५०० रुपैयाँ जरिवाना र १ हजार ३०० रुपैयाँ पीडित राहत कोष रकम तिर्नुपर्ने फैसला गरेको थियो।

सजाय भुक्तान गरिरहेका राई जेन-जी आन्दोलनका क्रममा फरार भएका थिए ।

धादिङ प्रहरीले जेन-जी आन्दोलनका क्रममा विभिन्न कारागारबाट फरार भएका कैदीबन्दीमध्ये हालसम्म १५१ जनालाई पक्राउ गरी सम्बन्धित कारागारमा बुझाएको जिल्ला प्रहरी कार्यालय धादिङका सूचना अधिकारी दाहाल जानकारी दिनुभयो ।

प्रहरीले फरार कैदीबन्दीको खोजी तथा पक्राउ अभियानलाई निरन्तरता दिइरहेको जनाएको छ।