जेनजी आन्दोलनमा फरार अभियुक्त धादिङबाट पुनः चोरी काण्डमा पक्राउ,झण्डै छ लाख नगद बरामद

धादिङ । जेनजी आन्दोलनका क्रममा मकवानपुरको भिमफेदी कारागारबाट फरार भएका डाँका चोरी मुद्दाका प्रतिवादी पुनः चोरी घटनामा संलग्न रहेको आरोपमा पक्राउ परेका छन्।

उनीसँगै थप दुई जनालाई पनि प्रहरीले पक्राउ गरेको छ।

असार ४ गते मकवानपुरको कैलाश गाउँपालिका-२ बैकुण्ठस्थित बुद्धराम मोक्तानको घरबाट नगद ६ लाख रुपैयाँ चोरी भएको सूचनाका आधारमा प्रहरीले खोजी अभियान सञ्चालन गरेको थियो।

सोही क्रममा इलाका प्रहरी कार्यालय गजुरीबाट खटिएको टोलीले असार ५ गते गजुरी गाउँपालिका-६ आदमघाट बजारमा किरान्चोकबाट आदमघाटतर्फ आउँदै गरेको मोटरसाइकलहरुमा सवार तीन जनालाई पक्राउ गरेको जिल्ला प्रहरी कार्यालय धादिङका सूचना अधिकारी डिएसपी प्रकाश दाहालले जानकारी दिनुभयो।

पक्राउ पर्नेहरूमा मकवानपुरको कैलाश गाउँपालिका-२ बैकुण्ठ बस्ने बर्ष ३३ को रुद्र मोक्तान,धादिङको बेनिघाट रोराङ गाउँपालिका-१ जरुङ बस्ने बर्ष २१ को अशोक तामाङ र सोही स्थानका बर्ष १९ को उमेश तामाङ रहेका छन् ।

पक्राउ परेका रुद्र मोक्तान भने डांका चोरी मुद्धामा सजाय भोगिरहेका बेला जेनजी आन्दोलनमा भिमफेदी कारागारबाट भागि हालसम्म फरार रहेका थिए ।

रुद्र मोक्तान डाँका चोरी मुद्दामा सजाय भोगिरहेका बेला जेनजी आन्दोलनका क्रममा भिमफेदी कारागारबाट फरार भएका व्यक्ति रहेको प्रहरी अनुसन्धानबाट खुलेको छ।

प्रहरी अभिलेख अनुसार मोक्तानविरुद्ध यसअघि ज्यान मार्ने उद्योग, हातहतियार तथा खरखजना र चोरी तथा डाँका सम्बन्धी विभिन्न मुद्दा दर्ता भएका छन्।

२०७६ सालमा एक व्यक्तिलाई गोली हानी फरार रहेको आरोपमा उनी पक्राउ परेका थिए भने उनकै गोठबाट तीन थान भरुवा बन्दुक समेत बरामद भएको थियो।

प्रहरीका अनुसार रुद्र मोक्तानको साथबाट चोरी भएको रकममध्ये ५ लाख ८० हजार ५ सय ४० रुपैयाँ नगद बरामद गरिएको छ।

साथै ग.८ प ९३२१ र ना.१७ प ४१७५ नम्बरका दुई वटा मोटरसाइकल तथा तीन वटा मोबाइल फोन समेत बरामद गरिएको डिएसपी दाहालले जानकारी दिनुभयो।

पक्राउ परेका तीनै जनालाई बरामद सामानसहित थप अनुसन्धान तथा कानुनी कारबाहीका लागि इलाका प्रहरी कार्यालय पालुङ, मकवानपुर पठाइएको प्रहरी जनाएको छ।