बागमती प्रदेश बुद्धिचालमा ललितपुर टिम विजेता

हेटौंडा। प्रदेश खेलकुद विकास परिषद्, बागमती प्रदेशद्वारा आयोजित बुद्धिचाल प्रतियोगितामा ललितपुर जिल्ला टिम च्याम्पियन भएको छ ।

तिन दिन सञ्चालन भएको प्रतियोगितामा क्लासिकल, र्‍यापिड तथा ब्लिट्ज् बुद्धिचाल खेल पुरुष तथा महिला तिन विधामा ६ स्वर्ण, ६ रजत र ६ काश्य पदक मध्ये ललितपुर जिल्लाले २ स्वर्ण २ रजत पदक जित्दै च्याम्पियन बनेको हो ।

ललितपुरले पुरुष क्लासिकल र रापिड विधामा १/१ स्वर्ण, ब्लिट्ज् १ रजत र महिला र्‍यापिड १ रजत प्राप्त गर्यो । यस्तै चितवन जिल्ला टिम उपविजेता बनेका छन्।

यस क्रममा महिला तर्फ क्लासिकल र र्‍यापिड विधा तर्फ १/१ स्वर्ण पदक जित्न सफल भएका छन्।

यसैगरी काठमाडौं जिल्लाले प्रतिस्पर्धामा तृतीय स्थान हासिल गरेका छन्। काठमाडौं जिल्लाले महिला ब्लिट्ज १ स्वर्ण, १ रजत र १ काश्य पदक प्राप्त गरेका छन्।

स्पर्धामा काभ्रे जिल्लाले चौथो स्थान हासिल गर्दै पुरुष तर्फको ब्लिट्ज् १ स्वर्ण, क्लासिकल १ रजत पदक प्राप्त गरेका छन्।

मकवानपुर जिल्लाले पुरुष र्‍यापिड तर्फ १ रजत, धादिङ जिल्लाले महिला ब्लिट्ज् १ रजत पदक जितेका छन्।

यस्तै भक्तपुर जिल्लाले पुरुष तर्फ र्‍यापिड १, ब्लिट्ज् १ र महिला तर्फ ब्लिट्ज् १ पदक प्राप्त गरे। दोलखा जिल्लाले क्लासिकल पुरुष तर्फ १ काश्य पदक र रामेछाप जिल्लाले महिला तर्फ १ काश्य पदक हासिल गर्न सफल बनेका छन्।

बागमती प्रदेश खेलकुद विकास परिषद् बुद्धिचाल खेल संयोजक संगीत श्रेष्ठको सभापतित्वमा सम्पन्न भएको पुरस्कार वितरण तथा समापन समारोहमा प्रमुख अतिथि बागमती प्रदेश सांसद एकालाल श्रेष्ठले पुरुष विधातर्फ काभ्रेका शैलेन्द्र न्यौपाने र महिला विधा तर्फ चितवनका लक्ष्मी कँडेललाई उत्कृष्ट खेलाडीवाट र विजयी खेलाडीहरुलाई पुरस्कार वितरण गर्नुभएको थियो ।