पृथ्वी राजमार्गमा सवारी आवागमन बन्द, धादिङका विभिन्न स्थानमा होल्डिङ सेन्टर व्यवस्था

धादिङ। लगातारको भारी वर्षापछि नारायणगढ–मुग्लिङ सडकखण्डका विभिन्न स्थानमा पहिरो जाँदा सडक अवरुद्ध भएको छ।

यससँगै धादिङ प्रशासनले पृथ्वी राजमार्ग भएर सञ्चालन हुने सबै प्रकारका सवारी साधनको आवागमन अस्थायी रूपमा बन्द गरेको छ।

जिल्ला प्रशासन कार्यालय धादिङले सोमबार सूचना जारी गर्दै जिल्लाका विभिन्न स्थानमा पनि निरन्तर भारी वर्षा भइरहेको र पृथ्वी राजमार्गसहित अन्य सडक मार्गमा पहिरोको उच्च जोखिम रहेकाले सवारी आवागमन रोक लगाइएको जनाएको छ।

प्रशासनका अनुसार यात्रामा रहेका सवारी साधनलाई सुरक्षित स्थानमा राख्न सिक्रेखोला, खानीखोला बजार, महादेवबेँसी बजार, सिम्ले, गल्छी बैरेनी, आदमघाट, गजुरी बजार, मलेखु बजार, विशालटार र मझिमटारमा होल्डिङ सेन्टरको व्यवस्था गरिएको छ।

प्रमुख जिल्ला अधिकारी लक्ष्मी पाण्डेय (गौतम) ले जारी गर्नुभएको सूचनामा यात्रु तथा सवारी चालकलाई अनावश्यक यात्रा नगर्न, आवश्यक सतर्कता अपनाउन तथा सुरक्षा निकायको निर्देशन पालना गर्न आग्रह गरिएको छ।

यस्तै, देशभर मौसम सक्रिय रहेको र चीनको तिब्बत क्षेत्रमा समेत भारी वर्षा भइरहेका कारण त्यहाँका तालहरूमा पानीको सतह बढिरहेको जानकारी प्राप्त भएको प्रशासनले जनाएको छ।

यसका कारण कुनै पनि समयमा त्रिशूली नदीको बहाव एक्कासी बढ्न सक्ने सम्भावना रहेकाले नदी तथा खोलानाला आसपास बसोबास गर्ने स्थानीय, निर्माणाधीन तथा सञ्चालनमा रहेका आयोजनालाई विशेष सतर्कता अपनाउन अनुरोध गरिएको छ।

कुनै पनि विपद्जन्य घटना भएमा जिल्ला आपतकालीन कार्य सञ्चालन केन्द्र, स्थानीय जनप्रतिनिधि वा नजिकको सुरक्षा निकायलाई तत्काल जानकारी गराउन प्रशासनले आग्रह गरेको छ।

आपतकालीन सम्पर्कका लागि नेपाल प्रहरीको हटलाइन नम्बर १००, सशस्त्र प्रहरी बल नेपालको १११४, जिल्ला आपतकालीन सञ्चालन केन्द्रको १२३४ वा ०१०–५२०४६४ तथा जिल्ला प्रहरी कार्यालय धादिङका सूचना अधिकारीको नम्बर ९८५१२२९८६० मा सम्पर्क गर्न सकिने जनाइएको छ।