पृथ्वी राजमार्गको परेवाभिरमा शनिबार सवारी आवागमन पूर्ण रूपमा बन्द गरिने,वैकल्पिक बाटो प्रयोग गर्न आग्रह

धादिङ। बाढीका कारण क्षतिग्रस्त बनेको पृथ्वी राजमार्गअन्तर्गत धादिङको गजुरी गाउँपालिका-२ परेवाभिरमा सडक मर्मतका लागि भोलि शनिबार सवारी आवागमन पूर्ण रूपमा बन्द गरिने भएको छ।

शनिबार बिहान ६ बजेदेखि बेलुका ६ बजेसम्म परेवाभिरस्थित क्षतिग्रस्त सडकखण्ड हुँदै सञ्चालन हुने सम्पूर्ण सवारी साधनको आवागमनमा रोक लगाइने जिल्ला प्रशासन कार्यालय धादिङले जनाएको छ।

भदौ १० गते भोटेकोशी नदीमा आएको बाढीका कारण परेवाभिरस्थित पृथ्वी राजमार्गमा क्षति पुगेपछि हाल उक्त सडकखण्ड एकतर्फी रूपमा मात्र सञ्चालन हुँदै आएको छ।

क्षतिग्रस्त सडकको आवश्यक मर्मत कार्य गर्नुपर्ने भएकाले १२ घण्टाका लागि राजमार्ग पूर्ण रूपमा बन्द गर्न लागिएको प्रशासनले जनाएको छ।

यस अवधिमा अत्यावश्यक सवारी साधनतर्फ एम्बुलेन्स र शववाहनलाई भने आवागमनको अनुमति दिइनेछ।अन्य सबै प्रकारका सवारी साधन सञ्चालनमा पूर्ण रोक लगाइने भएको छ।

राजमार्ग बन्द हुने भएकाले प्रशासनले यात्रु तथा सवारी चालकहरूलाई सो अवधिमा वैकल्पिक मार्ग प्रयोग गरी यात्रा गर्न अनुरोध गरेको छ।