धादिङमा २३ शव तथा अंगको व्यवस्थापन,डीएनए नमुना सुरक्षित

धादिङ। बाढीका क्रममा धादिङका विभिन्न स्थानबाट फेला परेका पहिचान नखुलेका २३ शव तथा शरीरका अंगको व्यवस्थापन गरिएको छ।

गजुरी गाउँपालिका-५ गलौंदी हाइटस्थित ठूलो सामुदायिक वन क्षेत्रमा ती शव तथा अंगलाई आवश्यक कानुनी प्रक्रिया पूरा गरेर व्यवस्थापन गरिएको जिल्ला प्रहरी कार्यालय धादिङले जनाएको छ।

लामो समयसम्म पहिचान हुन नसकेका शव कुहिन थालेपछि संक्रमण तथा महामारी फैलिन सक्ने जोखिमलाई समेत ध्यानमा राखेर व्यवस्थापन गरिएको प्रहरीले जनाएको हो।

शव व्यवस्थापन गर्नुअघि सबैको मुचुल्का तयार गरिएको जिल्ला प्रहरी कार्यालय धादिङका सूचना अधिकारी डीएसपी प्रकाश दाहालले जानकारी दिनुभयो।

पोस्टमार्टमसँगै पहिचान खुलाउन सकिने गरी डीएनए परीक्षणका लागि आवश्यक नमुनासमेत संकलन गरिएको थियो।

प्रहरीका अनुसार व्यवस्थापन गरिएकामध्ये दुईवटा सग्लो शव छन् भने २१ वटा शरीरका विभिन्न अंग रहेका छन्।

प्रत्येक शव तथा अंगलाई पहिचान गर्न सहज हुने गरी छुट्टाछुट्टै नम्बर दिइएको छ।शवलाई छुट्टाछुट्टै खाडलमा राखेर व्यवस्थापन गरिएको प्रहरीले जनाएको छ।

डिएसपी दाहालका अनुसार भविष्यमा डीएनए परीक्षणबाट कुनै शवको पहिचान खुलेमा सम्बन्धित परिवारलाई जानकारी गराइनेछ।

त्यसपछि प्रचलित विधि तथा परिवारको चाहनाअनुसार अन्तिम संस्कारका लागि शव हस्तान्तरण गर्ने व्यवस्था मिलाइनेछ।

धादिङका विभिन्न स्थानबाट संकलन भएका शवमध्ये यसअघि २७ वटा पोखरा र ६ वटा काठमाडौं पठाएर व्यवस्थापन गरिएको थियो।

गजुरीमा रहेका पहिचान नखुलेका शव तथा शरीरका अंगसमेत व्यवस्थापन गरेपछि बाढीका क्रममा धादिङमा संकलित सम्पूर्ण शव व्यवस्थापनको काम पूरा भएको प्रहरीले जनाएको छ।