लुटपाटमा संलग्न धादिङका गोरे तामाङ र काठमाडौंका कृष्ण श्रेष्ठ पक्राउ

अडियोमा सुन्नुहोस

काठमाडौं ।सुनको सिक्री लुटपाटमा संलग्न रहेको अभियोगमा २ जना पक्राउ परेका छन् ।

पक्राउ पर्नेहरूमा धादिङको  धुनिवेशी नगरपालिका-२ घर भई काठमाडौं नागार्जुन नगरपालिका-४ शरणपुर बस्ने ४२ वर्षीय गोरे तामाङ र काठमाडौं महानगरपालिका-१५ बिजेश्वरी बस्ने ३९ वर्षीय वावु भन्ने कृष्ण प्रसाद श्रेष्ठ रहेका प्रहरीले जनाएको छ ।

काठमाडौं नागार्जुन नगरपालिका-६ टोखेल बस्ने ७२ वर्षीया वृद्धाले घाँटिमा लगाएको करिब २ तोला सुनको सिक्री बा-९६ प ५७१७ नम्बरको मोटरसाइकलमा आएका अपरचित व्यक्तिहरूले बिहीबार दिउँसो लुटपाट गरी फरार भएको भन्ने खबर प्राप्त हुनासाथ प्रहरी वृत्त स्वयम्भूबाट खटिएको प्रहरीले घटनामा संलग्न उनीहरूलाई पक्राउ गरेको हो ।

साथै प्रहरीले उनीहरूको साथबाट २ तोलाको सुनको सिक्री र १ थान मोटरसाइकल समेत बरामद गरेको छ। यस सम्बन्धमा प्रहरीले आवश्यक अनुसन्धान गरिरहेको प्रहरीले जनाएको छ।