सिद्धलेकका अध्यक्षमाथि हातपातको प्रयास भएको काँग्रेसको भनाई : स्थानीय भन्छन्-‘फुटबल प्रतियोगिताको कुरा गर्न खोज्दा भनाभन भयो’

धादिङ । सिद्धलेक गाउँपालिकाका अध्यक्ष परशुराम खतिवडामाथि भएको भनिएको दुर्व्यवहार घटनापछि नेपाली काँग्रेसले दोषीमाथि कारबाहीको माग गरेको छ।

भदौ ९ गते राति सिद्धलेक–१ कालिदहस्थित नवराज श्रेष्ठको घरमा भएको घटनाबारे काँग्रेस सिद्धलेक गाउँपालिका समिति सभापति रामशरण गिरीले प्रेस विज्ञप्ति जारी गर्दै गाउँपालिका अध्यक्षमाथि आक्रमणको प्रयास गरिएको बताउनुभएको छ।

विज्ञप्तिमा कृष्ण गुरुङ नेतृत्वको समूहले ढोका फोड्दै घरभित्र पसेर अध्यक्षलाई अभद्र, अमर्यादित तथा गुण्डागर्दी शैलीमा हातपात गर्ने प्रयास गरेको विज्ञप्तिमा उल्लेख छ।

विज्ञप्तिमा भनिएको छ, “स्थानीय सरकार प्रमुखमाथि मात्र नभई सम्पूर्ण लोकतान्त्रिक अभ्यासमाथि नै यस किसिमको व्यवहारले आघात पुर्‍याएको छ। घटनामा संलग्न व्यक्तिहरूलाई कानुनी दायरामा ल्याउन प्रशासनले तत्काल कडा कदम चाल्नुपर्छ।”

यस्तै, नेपाली काँग्रेस प्रदेश सभा क्षेत्रीय कार्यसमिति क्षेत्र नं १ (ख) का सभापति बिष्णु प्रसाद रुपाखेतीले पनि भदौ १३ गते अर्को विज्ञप्ति जारी गरी घटनाप्रति आपत्ति जनाउँदै कानुनी कारबाहीको माग गर्नुभएको छ ।

यस घटनामा संलग्न कृष्ण गुरुङसहित सम्पूर्ण व्यक्तिहरूमाथि कानुनी कारबाही गर्न सम्बन्धित प्रशासनसँग कडा माग गर्दछौं,बिज्ञप्तिमा भनिएको छ ।

यता गाउँपालिका अध्यक्षलाई अर्काको घर भित्र पसेर हातपातको प्रयास गरेको आरोप लागेका कृष्ण गुरुङले भने आफूले हातपात नगरेको दाबी गर्नुभएको छ ।

उहाँले अध्यक्षसँग केही दिनदेखि भेट्न खोज्दा समय नपाएपछि सोमबार राति भेटेर कुरा गर्न खोज्दा सामान्य भनाभन मात्रै भएको बताउनुभयो ।

उहाँले भन्नुभयो, “हामीले भेट्न खोज्दा उहाँ व्यस्त छु भन्नुहुन्थ्यो,फोन मार्फत बिहानै बाट फुटबल प्रतियोगिताको बिषयमा सल्लाह गर्नुपर्यो भन्दा म सँग समय छैन भ्याउदिँन भन्नुभयो,तर त्यस रात ८ः३० बजेको समयमा कालिदह स्थित नवराज श्रेष्ठको घरमा सरकारी गाडी छ भन्ने थाहा पाएपछी हामी त्यहीँ भेट्न गएका हौँ,भेटपछी केही युवाहरु आक्रोशित बने,सामान्य भनाभन भयो र अध्यक्ष खतिवडाले आगामी असोजमा म्हयोन्दोमाया युवा क्लबले आयोजना गर्ने फुटबल प्रतियोगिताको लागि सहयोग गर्ने प्रतिबद्धता गरी सम्झौता गर्न भोलि पालिका आउनु भनेर बाहिरीनुभएको हो । भोलि पल्ट हामी युवाहरुको टिम प्रतियोगितको लागि प्रतिबद्धताअनुसार गएर सम्झौता गर्यौ तर काँगेसले म माथी झुठो आरोप लगाएको छ,घटनालाई अतिरन्जित गरिएको छ।”

भेट्न खोज्दा समय नदिएपछि आक्रोशित भएका युवाले रातीको समयमा अध्यक्षलाई भेटेपछि कुराकानी गर्न खोज्दा भनाभन भई दुवै पक्षबाट अश्लिल शव्दहरु प्रयोग भएको र केही युवाले सो भिडियो समेत खिचेको भएपनि त्यहाँ बोलेका शव्द निकै अपाच्य र अश्लिल भएकाले सञ्चार माध्यम तथा सामाजिक सञ्जालमा सार्वजनिक गर्न नसकिने अवस्था रहेको युवाहरुले वताएका छन् । यस घटनालाई राजनैतिक रंग लगाइएको युवाहरूले आरोप लगाएका छन्।

आगामी असोज ६ देखि ८ गतेसम्म बाँजगैरा खेलमैदानमा हुन लागेको प्रथम सिद्धलेक म्हेन्दोमाया कप फुटबल प्रतियोगितालाई असर पार्ने उद्देश्यले यस घटना अतिरञ्जित गरिएको हुन सक्ने सिद्धलेक–१ नयाँबस्तीका जोन लामाले बताउनुभयो ।

उता, गाउँपालिका अध्यक्ष खतिवडाले भने अहिलेसम्म यसबारे कुनै आधिकारिक प्रतिक्रिया नदिएको कारण घटनाले थप जटिल रुप लिएको छ।

नेपाली काँग्रेस सिद्धलेक गाउँपालिका समिति सभापति रामशरण गिरीले जारी गर्नुभएको प्रेस विज्ञप्ति

प्रदेश सभा क्षेत्रीय कार्यसमिति क्षेत्र नं १ (ख) का सभापति बिष्णु प्रसाद रुपाखेतीले जारी गर्नुभएको प्रेस विज्ञप्ति