आवश्यकता अनुसार विकास निर्माणमा ध्यान दिन एमाले उम्मेदवार त्रिपाठीलाई मतदाताको आग्रह

धादिङ । आसन्न फागुन २१ गते हुने प्रतिनिधिसभा सदस्य निर्वाचन अन्तर्गत धादिङ क्षेत्र-१ का नेकपा एमाले उम्मेदवार भूमि त्रिपाठीलाई मतदाताहरूले भूमिस्थान र तसर्पु क्षेत्रलाई समेट्ने गरी विकाससँग जोड्न आग्रह गरेका छन्।

मतदाता भेटघाट कार्यक्रमका क्रममा बिहिवार दक्षिणी धादिङको थाक्रे गाउँपालिका वडा नम्बर २, ३ र ४ का विभिन्न बस्तीहरूमा पुगेका त्रिपाठीसँग स्थानीय नागरिकहरूले आफ्ना आवश्यकता अनुसार विकास निर्माण तथा नीति, नियम र कानुन निर्माणमा ध्यान दिन आग्रह गरेका हुन्।

यद्यपि प्रतिनिधिसभा सदस्यको मुख्य भूमिका नीति तथा कानुन निर्माण भए पनि नागरिकहरूले त्रिपाठीसँग विकास र समृद्धिका पक्षमा सक्रिय भूमिका निर्वाह गर्न अपेक्षा गरेका छन्।

महादेबबेसी–निगाले, आग्रा सडक, महादेबबेसी–रातमाटे चल्ती सडक कालोपत्रे लगायतका योजनाहरू गाउँमा ल्याउन स्थानीयको माग रहेको छ।

साथै सिंचाइ, खानेपानी, शिक्षा र स्वास्थ्य क्षेत्रमा सरल पहुँच सुनिश्चित हुने गरी नीति निर्माण गर्न समेत उनीहरूले आग्रह गरेका छन्।

मतदाताहरूका माग र सवालको सम्बोधन गर्दै उम्मेदवार त्रिपाठीले नागरिकको चाहना र आवश्यकतालाई प्राथमिकतामा राखेर नीति, नियम तथा कानुन निर्माण गर्ने र विकास निर्माणका योजनाहरू गाउँसम्म पुर्‍याउने प्रतिबद्धता जनाएका छन्।

बिहीबार महादेबबेसी, समनटार, सिम, मिलनचोक, भूमिचुली, डाँडाखर्क, डाँडागाउँ, निगाले, लिति, बाहुनथान र धैरेनीका मतदाताको घर-घरमा पुगेर जनमुखी नीति निर्माण तथा विकास कार्यक्रमहरूमा जनताको पहुँच सुनिश्चित गर्न सघाउने त्रिपाठीले प्रतिबद्धता व्यक्त गरेका छन्।