विकास र रोजगारीलाई प्राथमिकता दिदैँ नेकपाका उम्मेदवार भण्डारी घरदैलोमा व्यस्त

धादिङ । धादिङ निर्वाचन क्षेत्र नम्बर २ मा नेपाल कम्युनिष्ट पार्टीका प्रतिनिधिसभा सदस्य उम्मेदवार रामबहादुर भण्डारी यतिबेला घरदैलो अभियानमा व्यस्त देखिनुभएको छ।

निर्वाचन आचारसंहितालाई पूर्ण रूपमा पालना गर्दै उहाँ मतदातासँग प्रत्यक्ष भेटघाट र अन्तरसंवादमा केन्द्रित हुनुभएको छ ।

‘तारा अभियान’ नाम दिइएको कार्यक्रमअन्तर्गत भण्डारीले विभिन्न गाउँटोल पुगेर स्थानीय बासिन्दासँग छलफल गरिरहनुभएको छ ।

साधँभञ्ज्याङदेखि काउले डाँडा, खत्री गाउँ, सालबास, देउराली, रामपुर, सिम्ले, धुर्सेनी, खरी मैदान, जौबारी, कालिका बराह हुँदै ढोला हटियासम्म पुगेर उनले मतदाताका समस्या र अपेक्षा सुन्नुभएको छ ।

भेटघाटका क्रममा उहाँले विकास निर्माण, रोजगारी सिर्जना, शिक्षा सुधार, स्वास्थ्य सेवाको पहुँच विस्तार तथा आधारभूत पूर्वाधार निर्माणलाई आफ्नो मुख्य एजेण्डा रहेको बताउनुभयो ।

“जनताको घरदैलोमै पुगेर उनीहरूको वास्तविक समस्या बुझ्नु हाम्रो दायित्व हो। समाधानसहितको स्पष्ट योजना लिएर हामी चुनावी मैदानमा उत्रिएका छौं,” उहाँले भन्नुभयो ।