थाक्रेमा नेपाली काग्रेस परित्याग गरी २३ नेता कार्यकर्ता एमालेमा प्रवेश

धादिङ । थाक्रे गाउँपालिका–८ मा २३ जना नेता तथा कार्यकर्ता नेपाली कांग्रेस परित्याग गरी नेकपा एमालेमा प्रवेश गरेका छन्।प्रवेश गर्नेहरूमा कांग्रेस थाक्रेका नेता कपिन्द्र सुवेदी, यादब सुवेदी, उमेश सुवेदी लगायत रहेका छन् ।

नवप्रवेशीहरूले नेकपा एमालेले देशको विकास र समृद्धिका लागि निरन्तर काम गरिरहेको भन्दै आफूहरू गलत बाटो छाडेर एमाले रोजेको बताएका छन् ।

समाज विकास, देशप्रेम र नागरिक उन्नतिका एजेन्डा एमालेसँग मात्र सम्भव रहेको उनीहरूको भनाइ थियो। उनीहरूले आगामी निर्वाचनमा एमाले उम्मेदवारलाई जिताउन सक्रिय रूपमा लाग्ने प्रतिबद्धता व्यक्त गरेका छन् ।

एमालेमा प्रवेश गर्नेहरूलाई भूमि त्रिपाठीले स्वागत गर्दै “समृद्ध नेपाल, सुखी नेपाली” को राष्ट्रिय अभियान एमालेकै नेतृत्वमा मात्र साकार हुने दाबी गर्नुभयो ।

उहाँले कृषिको व्यवसायीकरण, वैकल्पिक राजमार्ग निर्माण तथा काठमाडौं नजिकको केवलपुर–जिवनपुर क्षेत्रलाई व्यवस्थित सहरका रूपमा विकास गर्ने योजना अघि बढाइएको जानकारी दिनुभयो ।

उम्मेदवार त्रिपाठीले आगामी दिनमा जनतासँग गरेका प्रतिबद्धता पूरा गर्न एमाले दृढतापूर्वक लाग्ने बताउँदै नवप्रवेशीहरूलाई पार्टी संगठन सुदृढीकरणमा सक्रिय भूमिका खेल्न पनि आग्रह गर्नुभयो ।