गाँजा खेतीलाई वैधानिक बनाउने कानूनका लागि लाग्नेछु : एमाले उम्मेदवार त्रिपाठी

धादिङ । नेपाल कम्युनिष्ट पार्टी (एमाले) का उम्मेदवार भूमि त्रिपाठीले गाँजा खेतीलाई कानूनी मान्यता दिन आवश्यक रहेको बताउनुभएको छ।

गजुरी लगायत महाभारत क्षेत्रको आर्थिक समृद्धिका लागि त्यहाँ उत्पादन हुने गाँजा खेतीलाई कानूनी मान्यता दिन आवश्यक रहेको उल्लेख गर्दै त्रिपाठीले त्यसका लागि कानून निर्माण गर्ने प्रतिबद्धता व्यक्त गर्नुभयो।

“गाँजा खेतीलाई वैधानिक बनाउने कानूनका लागि लाग्नेछु,” उहाँले भन्नुभयो।

निर्वाचित भएपछि नियन्त्रित र व्यवस्थित रूपमा गाँजा खेती सञ्चालन गर्ने व्यवस्था मिलाइने र यसबाट स्थानीयवासीको आयआर्जन वृद्धि हुने विश्वास उहाँले व्यक्त गर्नुभयो।

मतदाता भेटघाट तथा घरदैलो अभियानका क्रममा गजुरी गाउँपालिका वडा नम्बर ३, ५ र ६ मा पुग्नुभएका त्रिपाठीले विगतमा भएका विकास निर्माणका कामहरू एमालेकै नेतृत्वमा सम्भव भएको दाबी गर्दै उहाँले अब पनि विकास र समृद्धिको यात्रालाई निरन्तरता दिन एमालेले मात्र प्रभावकारी भूमिका खेल्न सक्ने बताउनुभयो।

उहाँका अनुसार सबै गाउँपालिकामा अस्पताल, सबै वडामा स्वास्थ्य चौकी, प्रत्येक घरमा विद्युत् जस्ता आधारभूत पूर्वाधार विस्तार एमाले सरकारकै प्राथमिकतामा परेका कामहरू हुन्।

त्रिपाठीले मतदाताका समस्या समाधानमा आफू प्रतिबद्ध रहने बताउँदै उहाँले समर्थन र मतका लागि आग्रह गर्नुभएको छ।