जनताका सुझाव कार्यान्वयन गर्ने घलेको प्रतिबद्धता

धादिङ । निर्वाचन नजिकिँदै गर्दा उम्मेदवारहरूको घरदैलो अभियान तीव्र बनेको छ।

यसक्रममा धादिङ क्षेत्र नम्बर २ मा नेपाल कम्युनिष्ट पार्टी (एमाले) उम्मेदवार धनबहादुर घलेलाई साविक खाल्टे गाविस क्षेत्रमा स्थानीयले भव्य स्वागत गरेका छन्।

घलेले पूर्व गाविस उपाध्यक्ष रामबहादुर गुरुङको शालिकमा माल्यार्पण गर्दै पार्टीका अग्रजले देखाएको समृद्धि र परिवर्तनको मार्गलाई निरन्तरता दिने प्रतिबद्धता जनाउनुभयो।

उहाँले जनताबाट प्राप्त सुझावलाई कार्यान्वयन गर्ने र विकासका काममा कुनै सम्झौता नगर्ने बताउनुभयो।

डाँडागाउँ, धुसेनी, पतेनी, पात्ले लगायतका स्थानमा मतदातासँग भेटघाट गर्दै घलेले स्वास्थ्य, खानेपानी र शिक्षा एमालेको प्राथमिकतामा रहेको उल्लेख गर्दै एमालेलाई विजयी गराउन आग्रह गर्नुभयो।