गल्छी गाउँपालिकामा आगामी बजेट तर्जुमा अघि सरोकारवाला बाट सुझाव संकलन

गल्छी। धादिङको गल्छी गाउँपालिकाले आर्थिक वर्ष २०८३/०८४ को नीति, कार्यक्रम तथा बजेट तर्जुमालाई सहभागितामूलक, समावेशी र जनमुखी बनाउने उद्देश्यले राय, सल्लाह तथा सुझाव संकलन गरेको छ।

गाउँपालिकाको सभाहल बैरेनीमा आयोजित कार्यक्रममा स्थानीय तहमा क्रियाशील राजनीतिक दलका प्रतिनिधि, शिक्षक, विभिन्न संघ-संस्था, सहकारी, बुद्धिजीवी, समाजसेवी, ज्येष्ठ नागरिक सञ्जाल, आमा तथा महिला समूह, बाल समूह सञ्जाल, युवा क्लब, सञ्चारकर्मी तथा अन्य सरोकारवालाहरूको सहभागिता रहेको थियो।

कार्यक्रममा सहभागीहरूले गाउँपालिकाको समग्र विकासका लागि कृषि, शिक्षा, स्वास्थ्य, खानेपानी, सडक पूर्वाधार, पर्यटन प्रवर्द्धन, युवा तथा खेलकुद, महिला तथा बालबालिका, रोजगार सिर्जना, सामाजिक सुरक्षा तथा वातावरण संरक्षण लगायतका क्षेत्रमा आवश्यक नीति तथा कार्यक्रमबारे सुझाव दिएका थिए।

सहभागीहरूले स्थानीय आवश्यकता, जनचाहना र बालमैत्री अवधारणालाई केन्द्रमा राखेर आगामी नीति तथा कार्यक्रम निर्माण गर्नुपर्नेमा जोड दिएका थिए।

कार्यक्रममा प्राप्त सुझावहरूलाई आगामी आर्थिक वर्षको नीति, कार्यक्रम तथा बजेट निर्माण प्रक्रियामा समावेश गरिने गाउँपालिकाले जनाएको छ।

गाउँपालिकाका प्रमुख प्रशासकीय अधिकृत पूर्णप्रसाद दुलालले सञ्चालन गर्नुभएको कार्यक्रममा सहभागीहरूले आगामी बजेट तथा कार्यक्रम जनमैत्री, विकासमुखी र परिणाममुखी हुने विश्वास व्यक्त गरेका थिए।