धादिङको नीलकण्ठ नगरपालिकाले ल्यायो १ अर्ब २४ करोड बढीको बजेट

धादिङ । नीलकण्ठ नगरपालिकाले आगामी आर्थिक वर्ष २०८३/८४ का लागि १ अर्ब २४ करोड ८८ हजार रुपैयाँको बजेट सार्वजनिक गरेको छ।

बिहीबार बसेको नगरसभाको १९औँ अधिवेशनमा उपप्रमुख दीपक विश्वकर्माले बजेट प्रस्तुत गर्नुभएको हो।

बजेटअनुसार चालु खर्चतर्फ ८७ करोड २७ लाख ५३ हजार रुपैयाँ तथा पूँजीगत खर्चतर्फ ३६ करोड ७३ लाख ३५ हजार रुपैयाँ विनियोजन गरिएको छ।

आगामी बर्षको बजेट चालु आर्थिक वर्ष २०८२/८३ को बजेटभन्दा १ करोड ७ लाख ८३ हजार रुपैयाँ बढी रहेको नगरपालिकाले जनाएको छ।

नगरपालिकाका अनुसार चालु आर्थिक वर्ष २०८२/८३ को असार ३ गतेसम्म कुल १ अर्ब २६ करोड २९ लाख ४२ हजार ६ सय ६३ रुपैयाँमध्ये ७० करोड १८ लाख ५३ हजार ६१ रुपैयाँ खर्च भएको छ। यो कुल बजेटको ५५ दशमलव ५७ प्रतिशत हो।

आन्तरिक आयतर्फ ६ करोड ६० लाख रुपैयाँ लक्ष्य राखिएकोमा ३ करोड ३७ लाख २६ हजार रुपैयाँ आम्दानी भएको छ, जुन ५६ दशमलव २१ प्रतिशत हो।

त्यस्तै राजस्वतर्फ १३ करोड ४ लाख ६४ हजार ४ सय १९ रुपैयाँ अनुमान गरिएकोमा ११ करोड २६ लाख २० हजार रुपैयाँ आम्दानी भएको छ, जुन ८६ दशमलव ३२ प्रतिशत रहेको छ।

क्षेत्रगत खर्च विवरणअनुसार आर्थिक विकासतर्फ १८ दशमलव ३४ प्रतिशत, सामाजिक विकासतर्फ ६७ दशमलव ७६ प्रतिशत, पूर्वाधार विकासतर्फ ३२ दशमलव ३९ प्रतिशत, सुशासन तथा अन्तरसम्बन्धित क्षेत्रतर्फ ४४ दशमलव ५३ प्रतिशत तथा कार्यालय सञ्चालन र प्रशासनिकतर्फ ३० दशमलव ४४ प्रतिशत खर्च प्रगति भएको उपप्रमुख विश्वकर्माले जानकारी दिनुभयो।

आगामी आर्थिक वर्षको बजेटमा कृषि, शिक्षा, स्वास्थ्य, युवा, पूर्वाधार तथा सुशासनलाई प्राथमिकता दिइएको छ।

कृषि तथा पशुपालन क्षेत्रका लागि बिउ वितरण, बाली संरक्षण, किसानसँग चौतारी, उत्कृष्ट उद्योग तथा बाली प्रवर्द्धनलगायत कार्यक्रम सञ्चालन गरिने भएको छ।

भाषा, कला, संस्कृति तथा ऐतिहासिक सम्पदाको संरक्षण र प्रवर्द्धनका लागि समेत बजेट व्यवस्था गरिएको छ।

शिक्षा क्षेत्रतर्फ कक्षा १२ सम्मको अनिवार्य निःशुल्क शिक्षालाई निरन्तरता दिन ८ करोड २२ लाख रुपैयाँ विनियोजन गरिएको छ।

स्वास्थ्य क्षेत्रतर्फ नगर स्वास्थ्य परीक्षण, स्वास्थ्य संस्थाको स्तरोन्नति तथा उपकरण मर्मत–सम्भारका कार्यक्रम सञ्चालन गरिने जनाइएको छ।

युवा तथा खेलकुद क्षेत्रका लागि ५४ लाख ५० हजार रुपैयाँ विनियोजन गरिएको छ भने युवाको सीप, उद्यमशीलता र नेतृत्व विकासका कार्यक्रमका लागि ९ लाख ५५ हजार रुपैयाँ छुट्याइएको छ।

रोजगारी सिर्जना तथा प्रवर्द्धनका लागि २५ लाख रुपैयाँ र वैदेशिक रोजगारीसम्बन्धी परामर्श तथा पुनःएकीकरण कार्यक्रमका लागि १७ लाख रुपैयाँ बजेट व्यवस्था गरिएको छ।

खानेपानी, सरसफाइ तथा फोहोरमैला व्यवस्थापनका लागि ४० लाख रुपैयाँ तथा फोहोरमैला व्यवस्थापनका लागि थप ३० लाख रुपैयाँ विनियोजन गरिएको छ।

लिफ्ट खानेपानी योजनाको विद्युत महसुलमा ५० प्रतिशत अनुदान दिने व्यवस्था पनि बजेटमा समावेश गरिएको छ।

पूर्वाधार विकासअन्तर्गत सबै वडा कार्यालयसम्म कालोपत्रे सडक पुर्‍याउने लक्ष्यसहित विभिन्न सडक योजनाका लागि १३ करोड २३ लाख रुपैयाँ विनियोजन गरिएको छ।

नगरका १४ वटै वडामा सडक स्तरोन्नति तथा कालोपत्रे कार्यक्रम सञ्चालन गरिने जनाइएको छ।

नगर सौन्दर्यीकरण तथा करिडोर निर्माणका लागि ४० लाख रुपैयाँ तथा विपद् व्यवस्थापन कोषका लागि ५० लाख रुपैयाँ विनियोजन गरिएको छ।

सूचना तथा प्रविधि क्षेत्रतर्फ नेटवर्क विस्तार, सिसी क्यामेरा जडान तथा मर्मत–सम्भारका लागि ७० लाख रुपैयाँ बजेट छुट्याइएको छ।

न्यायिक समितिमार्फत मेलमिलाप, कानुनी सहायता तथा न्यायमा पहुँच अभिवृद्धि गर्न १३ लाख रुपैयाँ विनियोजन गरिएको नगरपालिकाले जनाएको छ।

यसैबीच नगरप्रमुख भीमप्रसाद ढुङ्गानाले आगामी आर्थिक वर्षका लागि नीति तथा कार्यक्रम प्रस्तुत गर्दै सुशासन, सेवा प्रवाह, कृषि, शिक्षा, स्वास्थ्य, रोजगार, युवा, खेलकुद, पूर्वाधार, पर्यटन तथा वातावरण संरक्षणलाई प्राथमिकतामा राखिएको बताउनुभयो।

उहाँले सेवा प्रवाहलाई थप सरल, सहज, छिटो र पारदर्शी बनाउने, डिजिटल तथ्यांक प्रणाली स्थापना गर्ने, “एक वडा–एक उत्पादन” कार्यक्रमलाई परिष्कृत गर्दै “एक वडा–एक पहिचान” को अवधारणा कार्यान्वयन गर्ने तथा स्थानीय उत्पादनको ब्रान्डिङलाई प्रोत्साहन गर्ने नीति लिइएको जानकारी दिनुभयो।

त्यस्तै प्राविधिक तथा सीपमूलक शिक्षामा जोड, स्वास्थ्य बीमा कार्यक्रमको प्रभावकारी कार्यान्वयन, नगर युवा तथा खेलकुद विकास समिति गठन, खेलमैत्री नगर अभियान सञ्चालन, नगर गौरवका आयोजना, चक्रपथ, करिडोर तथा नीलकण्ठ सिटी पार्क निर्माणलाई प्राथमिकतामा राखिएको छ।

पर्यटन प्रवर्द्धनका लागि होमस्टे विस्तार, नमुना बस्ती तथा स्मार्ट बस्ती विकास, दिगो विकास लक्ष्यको स्थानीयकरण, फोहोरमैला व्यवस्थापन तथा ‘एक घर–एक धारा’ अभियानलाई पनि नीति तथा कार्यक्रममा समेटिएको छ।

नगरसभामा प्रस्तुत नीति तथा कार्यक्रम र आर्थिक विधेयक–२०८३ सर्वसम्मत रूपमा पारित गरिएको छ। बजेट भने आगामी बैठकमा छलफलपछि पारित गरिने नगरपालिकाले जनाएको छ।