नेपालको सार्वजनिक ऋण झण्डै ३० खर्ब

काठमाण्डौ । नेपाल सरकारले तिर्नुपर्ने कुल सार्वजनिक ऋण झण्डै ३० खर्ब रुपैयाँ पुगेको छ ।

सार्वजनिक ऋण व्यवस्थापन कार्यालयका अनुसार, चालु आर्थिक वर्षको पहिलो दुई महिना अर्थात् भदौ मसान्तसम्ममा कुल सार्वजनिक ऋण २९ खर्ब ७३ अर्ब ५ करोड रुपैयाँ पुगेको हो ।

असार मसान्तको तुलनामा भने भदौमा सार्वजनिक ऋण केही घटेको छ । सरकारले नयाँ लिएको ऋणभन्दा पुरानो ऋणको सावाँ भुक्तानी बढी गरेकाले कुल ऋणको आकार घटेको हो ।

यस अवधिमा सरकारले ६१ अर्ब ५ करोड नयाँ ऋण लिएको छ भने, ७० अर्ब १३ करोड रुपैयाँ सावाँ भुक्तानी गरेको छ ।

कुल ऋणमध्ये आन्तरिक ऋण १३ खर्ब ६१ अर्ब ८७ करोड र बाह्य ऋण १६ खर्ब ११ अर्ब १८ करोड रुपैयाँ रहेको छ ।

नेपालको कुल सार्वजनिक ऋण कुल गार्हस्थ्य उत्पादन (जिडिपी) को ४५ दशमलव ०५ प्रतिशत पुगेको छ ।

चालु आर्थिक वर्षमा सरकारले ६ खर्ब ५८ अर्ब रुपैयाँ सार्वजनिक ऋण परिचालन गर्ने लक्ष्य राखेको छ ।

जसमध्ये भदौ मसान्तसम्ममा वार्षिक लक्ष्यको झण्डै ९ प्रतिशत अर्थात् ६१ अर्ब ५ करोड रुपैयाँ ऋण लिइएको छ ।

ऋण परिचालनमा आन्तरिक ऋणको हिस्सा झण्डै ८२ प्रतिशत र बाह्य ऋणको हिस्सा १८ प्रतिशत रहेको छ