दोस्रो सिद्धलेक अध्यक्ष कप असोज २५ देखि,विजेताले एक लाख रुपैयाँ पाउने

धादिङ । धादिङको सिद्धलेक गाउँपालिकामा ‘दोस्रो सिद्धलेक अध्यक्ष कप ९ ‘ए’ साइड खुला फुटबल प्रतियोगिता’ आयोजना हुने भएको छ।

नलाङ कुम्पुर युनाइटेड युथ क्लब (NKUYC), कालिदहको आयोजना तथा सिद्धलेक गाउँपालिकाको सह-आयोजनामा वडा नम्बर १ नयाँबस्ती स्थित बाँझोगरा खेलमैदानमा असोज २५ गतेदेखि खुला फुटबल प्रतियोगिता हुन लागेको हो।

प्रतियोगिताको प्रथम पुरस्कार नगद १ लाख रुपैयाँसहित ट्रफी,मेडल र प्रमाणपत्र रहेको छ भने द्वितीय पुरस्कार नगद ५० हजार रुपैयाँसहित मेडल र प्रमाणपत्र रहेको आयोजक NKUYC का अध्यक्ष भिक्टर तामाङले बागमती कलमलाई जानकारी दिनुभयो।

त्यसैगरी प्रतियोगितामा तृतीय र सान्त्वना हुने टिमले समान १५/१५ हजार रुपैयाँ नगद सहित मेडल र प्रमाणपत्र पाउने छन् ।

प्रतियोगितामा सहभागी हुन चाहने टिमले असोज २३ गतेसम्म टिम दर्ता गरिसक्नुपर्नेछ।

टिम दर्ता शुल्क १० हजार रुपैयाँ तोकिएको छ।

‘युवाहरूको बाटो कुलत र दुर्व्यसन होइन, समाज विकास र राष्ट्र निर्माण हो’ भन्ने मूल नाराका साथ आयोजना हुन लागेको प्रतियोगिता असोज २७ गतेसम्म सञ्चालन हुनेछ।

आयोजक क्लबका अध्यक्ष भिक्टर तामाङले प्रतियोगिताले सिद्धलेकमा खेलकुदको वातावरण निर्माण गर्नुका साथै स्थानीय तथा आसपासका युवाहरूलाई आफ्नो प्रतिभा प्रदशन गर्ने अवसर प्रदान गर्ने बताउनुभयो।

उहाँले प्रतियोगितालाई सफल बनाउन सबै टिम, खेलाडी, खेलप्रेमी तथा स्थानीयवासीको साथ र सहयोग आवश्यक रहेको उल्लेख गर्दै उत्साहजनक सहभागिताका लागि आग्रह गर्नुभयो।

यस्तै क्लबका सल्लाहकार कृष्ण गुरुङले प्रतियोगितामा सहभागी हुने टिमहरूबीचको स्वस्थ प्रतिस्पर्धाले खेलाडीको क्षमता र प्रतिभा उजागर गर्ने बताउनुभयो। उहाँले प्रतियोगितालाई व्यवस्थित र प्रतिस्पर्धात्मक बनाउन आयोजकले आवश्यक तयारी गरिरहेको बताउनुभयो।

प्रतियोगिताका सम्बन्धमा थप जानकारी तथा टिम दर्ताका लागि ९८५१२७७४२२, ९८६४४८८८६८, ९८५१२११८२६ र ९७४६४२१३९७ मा सम्पर्क गर्न सकिनेछ।