सिद्धलेक गाउँपालिकाको राष्ट्रपति रनिङ शिल्ड २८ गतेदेखि नलाङ पात्ले माविमा हुने

अडियोमा सुन्नुहोस

धादिङ । सिद्धलेक गाउँपालिका स्तरिय राष्ट्रपति रनिङ शिल्ड प्रतियोगिता वडा नं २ स्थित नलाङ खिर्रेभञ्ज्याङमा रहेको नलाङ पात्ले माविमा हुने भएको छ ।

गाउँपालिकाको आयोजना तथा नलाङ पात्ले माविको व्यवस्थापनमा यही मंसिर २८ देखि ३० सम्म रनिङ शिल्ड सञ्चालन गरिने नलाङ पात्ले माविका सह प्रधानाध्यापक अमृत गुरुङ(तिलक)ले बागमती कलमलाई जानकारी दिनुभयो।

प्रतियोगितामा छात्र/छात्रा तर्फको भलिबल, कबड्डी र एथलेटिक्स विधाको खेलहरु हुने बताईएको छ ।

सह प्रधानाध्यापक गुरुङका अनुसार एथलेटिक्सका केही खेलहरु वडा नं १ को बाँझगरामा हुने र बाँकी खेलहरु भने नलाङ पात्ले माविकै खेल मैदानमा हुने छन् ।

यस प्रतियोगितामा मार्शल आर्टका खेल चाहि नहुने भएको छ ।

गाउँपालिकामा मार्शल आर्टका खेलाडी कम भएकाले यस प्रतियोगितामा समावेश नगर्ने तर जिल्ला स्तरिय राष्ट्रपति रनिङ शिल्ड प्रतियोगिता भने खेलाडी पठाईने गुरुङले बताउनुभयो ।

उहाँका अनुसार प्रतियोगितामा १३ वटा सरकारी र १ निजी गरी १४ वटा माध्यमिक विद्यालयबाट एक हजार भन्दा बढि बिद्यार्थी सहभागी हुने छन् ।

प्रतियोगितामा सहभागी हुने सम्पूर्ण खेलाडीको गाउँपालिकाले बिमा गरिदिने उहाँको भनाई छ।

यस प्रतियोगिताबाट जिल्ला स्तरिय राष्ट्रपति रनिङ शिल्ड प्रतियोगिताका लागि खेलाडी छनोट हुने छन्।

गत वर्ष २०८० मा सिद्धलेक-३ डुमीडाँडाको अमरआदर्श माविमा भएको रनिङ शिल्डमा मिन्दुका मावि प्रथम, सत्यवती मावि दोस्रो र नलाङ पात्ले मावि तेस्रो भएको थियो ।