धादिङ अस्पतालमा आङ खस्ने समस्याको निःशुल्क शल्यक्रिया शिविर,आज पनि जारी रहने

धादिङ । धादिङ अस्पतालमा पाठेघर खस्ने समस्या सम्बन्धी निःशुल्क शल्यक्रिया शिविर आज पनि जारी रहेको छ।

बाग्मती प्रदेश र धादिङ अस्पतालको संयुक्त आयोजना तथा जनस्वास्थ्य कार्यालय धादिङको सहयोगमा दुईदिने निःशुल्क शल्यक्रिया शिविर सञ्चालन गरिएको हो ।

मंगलबारदेखी सन्चालन भएको शिविरको पहिलो दिन ११ जना पाठेघर खस्ने समस्या भएका महिलाहरुको शल्यक्रिया गरीएको धादिङ अस्पतालका निमित्त निर्देशक डा.गगन अधिकारीले जानकारी दिनुभयो ।

शिविरमा किस्ट मेडिकल कलेजमा कार्यरत बरिष्ठ स्त्री रोग बिशेषज्ञ डा.यम दुवाको टीमले शल्यक्रिया गरेको हो ।

शिविरको उद्घाटन समारोहलाई सम्बोधन गर्नुहुदै मंगलबार नीलकण्ठ नगरपालिकाका नगर उप प्रमुख दिपक विश्वकर्माले नीलकण्ठ नगरपालिकाको स्वास्थ्य क्षेत्रमा योगदान गर्ने यस्ता कामहरुमा नगरपालिकाले सहयोग गर्ने बताउनुभयो ।

ग्रामीण क्षेत्र र शहरी क्षेत्रमै पनि लुकेर बसेका यस्ता स्वास्थ्य समस्याहरुको न्यूनीकरणको लागि स्थानिय तह र अस्पताल मिलेर काम गर्नुपर्ने प्रमुख जिल्ला अधिकारी सुमन घिमिरेले जोड दिनुभयो ।

अस्पताल व्यवस्थापन समितिका अध्यक्ष राधिका सापकोटाले महिलाहरुले पाठेघर खस्ने समस्या लुकाउन बाध्य रहेको बताउदै यस्ता समस्याहरुलाई समाधान गर्नको लागि शिविरले थप मद्धत पुग्ने अपेक्षा लिएको बताउनुभयो ।

शिविर आज पनि जारी रहने अस्पतालका निमित्त निर्देशक डा.अधिकारीले बताउनुभयो।