झार्लाङको एक सय २५ घर अन्धकारमा

धादिङ । उत्तरी धादिङको खनियाबास गाउँपालिका १ झार्लाङमा विद्युत् ट्रान्सफर्मर पड्किँदा एक सातादेखि विद्युत् सेवा अवरुद्ध भएको छ ।

च्यामथली मेघामा रहेको ट्रान्सफर्मर पड्किएपछि झार्लाङका एक सय २५ घर परिवार ७ दिनदेखि अन्धकारमा रहेको झार्लाङबाट मनिष तामाङले बागमती कलमलाई जानकारी दिनुभयो ।

च्यामथली, मेगबुधु,गरस्योङ र ग्यल्म्रङका एक सय २५ घरधुरी अन्धकारमा रहेको तामाङले बताउनुभयो ।

सात दिन अघि सोही क्षेत्रमा चट्याङ परेको भएपनि ट्रान्सर्फमरमा भने चट्याङ नपरेको स्थानियको भनाइ छ ।विद्युत् आपूर्ति बन्द हुँदा स्थानीयले कुटानीपिसानी, साना घरेलु उद्योग सञ्चालन र सञ्चार सेवा प्रयोग गर्न पाएका छैनन् ।

पड्किएको ट्रान्सफर्मरको विषयमा प्राविधिकसँग बुझ्दा मर्मत नहुने जानकारी आएपछी नयाँ ल्याउने प्रक्रिया सुरु भएको गाउँपालिकाको वडा नं १ का वडा अध्यक्ष सोनाम बहादुर तामाङले बताउनुभयो ।