उत्तरी धादिङमा बाढी र पहिरोले ४ पुल बगायो : पहिरोको जोखिममा बस्ति,तर घर छाड्न मान्दैनन् स्थानिय

धादिङ । उत्तरी धादिङको रुवीभ्याली गाउँपालिकाका विभिन्न क्षेत्रमा बाढी र पहिरोले ठूलो मात्रामा क्षति पु¥याएको छ ।

रुबीभ्याली गाउँपालिकाको वडा नम्बर ५ र ६ का ४ वटा पुल बगाएपछि धेरै गाउँको आवत जावत बन्द भएको छ । वडा नम्बर ५ स्थित तिनचेत नेसुङ खोलामा रहेको ढलान पुल बाढीले बगाएपछि तिनचेत, चपाङचेत, छुम्राङ, तेनचेत आदी स्थानसंग सम्पर्क विच्छेद भएको छ ।

वडा नम्बर ५ र वडा नम्बर ६ जोड्ने राखोला काठेपुल, गल्दी खादिङको ट्रस पुल, थुवाखोला ट्रस पुल वर्षापछिको खोलाले बगाएपछि आवतजावत बन्द भएको लापाका स्थानीयबासी जिवन तामाङले जानकारी दिनुभयो ।

वर्षाको कारण खोला बढेकाले विद्यालय जानुपर्ने बालबालिकासमेत विद्यालय जान पाएका छैनन् ।ठूलो गाउँमा एसईई दिने विद्याथीलाई ट्युसन पढाउने भएपनि पुल बगाएपछि विद्यार्थीहरु पढाउने ठाउँसम्म आवतजावत गर्न पाएका छैनन् ।

१० दिनदेखिको लगातार वर्षले रुबीभ्यालीको धेरै गाउँ क्षतविक्षत बनाएको भएपनि स्थानीय सरकारका प्रतिनिधिले वेवास्ता गरेको स्थानीयबासीको आरोप छ ।

स्थानीय सरकारका प्रमुख, उपप्रमुख र प्रमुख प्रशासकीय अधिकृतसमेत गाउँमा नहुँदा पीडित नागरिकले साधारण राहत समेत पाउन सकेका छैनन् ।

बोराङबाट लापा जान नसकिने गरी आँखु खोला लगायतको खोलाले खोला छेउको बाटो भत्काएपछि गाउँबासी गाउँ जानसमेत पाएका छैनन् ।

लापा,ठूलो गाउँ, कपुर गाउँ, खादिङ लगायतको लापा क्षेत्रमा खाद्यान्न समेत लान नसकिने गरी बाटो खोलाले बगाएर सम्पर्क विच्छेद भएको र जोखिम उठाएर नागरिकहरु आउजाउ गरिरहेको लापाका घनबहादुर तामाङले बताउनुभयो ।

पहिरोले गर्दा धेरैजसो गाउँ जोखिममा परेको छ ।

लापाको तायुम, ब्रमदाङको १० घर, नेवेरको ५६ घरमध्ये ४२ घर, हिन्दुङको १ सय २० घर, रावा अवोइको १२ घर पहिरोको उच्च जोखिममा छ ।

गाउँमा पहिरो आएको छ तर सुरक्षित बस्नुपर्ने भएपनि गाउँबासी जोखिमको घरमा बसि रहेका छन् । अवोइको ३ घर भने हाल घर छाडेर त्रिपालमुनी बसिरहेका छन् ।

सरकारले जोखिम बस्ती भनेर घडेरी किन्ने पैसा दिएको भएपनि वडा नम्बर ५ को तेनचेतको ४२ घर, तिनचेतको ६८ घर, चपाङचेतको ३५ घर, छुमराङको ३६ घरका केही नागरिक अझै सोही जोखिम स्थानमा बसीरहेका छन् ।

केही नागरिक भने नीलकण्ठ नगरपालिका क्षेत्रमा घडेरी किनेर बसिरहेका छन् ।

उनिहरुका लागि सरकारले घडेरी किन्न २ लाख र घर बनाउन ३ लाख उपलब्ध गराएर घर बनाएको भनिएपनि भूकम्पपछि केही मानिसले भने जोखिमबस्ती छाड्न मानेका छैनन् ।