सडेको खानेकुरा बेच्ने धादिङको एक होटललाई दुई लाख जरिवाना, समयमै दाखिला नगरे कारोबार रोक्का गरिने

धादिङ । धादिङको थाक्रे गाउँपालिका–८ चारकिलोमा रहेको न्यू रिया होटललाई जिल्ला अनुगमन समितिले दुई लाख जरिवाना तिराएको छ ।

राजमार्गमा यात्रा गर्ने यात्रुलाई जवर्जस्ती बासी, सडेगलेको र दूषित खाना खुवाएको भेटेपछि जिल्ला अनुगमन समितिले उपभोक्ता संरक्षण ऐन २०७५ बमोजिम दुई लाख जरिवाना तिराएको हो ।

खाजा खान लाग्दा समोसा, तरकारी लगायतका खानेकुरा गनाएको विक्रि गरिरहेको गुनासो आएपछि प्रमुख जिल्ला अधिकारीको निर्देशनमा आईतबार प्रहरी र अनुगमन टोली होटल पुगेको थियो ।

अघिल्लो दिनमा नै तयार गरिराखेको खानेकुराहरु सडिसकेको फेला पारेको र त्यहि खानेकुरा यात्रुलाई विक्रि गरेको भेटिएपछि उपभोक्ता संरक्षण ऐन २०७५ को दफा १६ उपदफा २ (क) बमोजिम अनुचित व्यापारिक क्रियाकलाप गरेको कसुरमा दुई लाख जरिवाना गरिएको जिल्ला अनुगमन समितिका संयोजक एवम् सहायक प्रमुख जिल्ला अधिकारी युवराज अर्यालले जानकारी दिनुभयो।

शनिबार बिहान एकजना उपभोक्ताले प्रमुख जिल्ला अधिकारीलाई टेलिफोन गरेर रिया होटलले बासी, सडेगलेको खानेकुरा विक्रि गरिरहेको गुनासो गर्नुभयो ।

त्यस लगत्तै जिल्ला प्रहरी कार्यालय धादिङमार्फत प्रहरी कार्यालय खानीखोलाबाट प्रहरी टोली होटलमा पुग्यो ।

फ्रिजमा राखेको खानेकुरा समेत गनाएको फेला परेपछि वडा अध्यक्षसहित जनप्रतिनिधिको रोहबरमा मुचुल्का गरी होटल संचालक नुवाकोट शिवपुरी गाउँपालिका–८ का ३९ वर्षीय राजेश पाठकलाई गिरफ्तार गरिएको सहायक प्रमुख जिल्ला अधिकारी अर्यालले बताउनुभयो ।

बिहान विक्रि गरिरहेको खानेकुरा अघिल्लो दिनमा नै बनाएर फ्रिजमा राखेको र तापक्रम नमिलेकोले गन्ध आएको सञ्चालकले स्वीकार गरेकोले उपभोक्ता संरक्षण ऐन बमोजिम जरिवाना तोकिएको उहाँको भनाई छ ।

जरिवाना तथा सजाय चित्त नबुजेको खण्डमा पुनरावेदन जान सक्ने सहायक प्रमुख जिल्ला अधिकारी अर्यालले बताउनुभयो ।

होटल सञ्चालक पाठकलाई एक साताभित्र तोकिएको जरिवाना दाखिला गर्ने समय तोकेर पठाइएको र तोकिएको समयमा जरिवाना दाखिला नगरे कारोबार रोक्का गरिने जिल्ला बजार अनुगमन समिति धादिङका सदस्य सचिव एवं् उद्योग तथा वाणिज्य कार्यालय धादिङका प्रमुख मेगराज गौतम बताउनुभयो ।

जरिवानामा परेको होटललाई २०८० असोज ६ गते जिल्ला अनुगमन टोलीले होटलको किचन र बाहिरी सरसफाईमा ध्यान दिन, कामदारलाई अनिवार्य मास्क प्रयोग गराउन निर्देशन दिएको थियो । विगतका समयमा गरिएको अनुगमनका क्रममा दिएको निर्देशन पनि पालना नगरेको गौतमको भनाई छ ।

पछिल्लो समय जिल्ला प्रशासन कार्यालय, उद्योग तथा वाणिज्य कार्यालयसहित नियामक निकायले जिल्लाका होटल तथा पसलहरुको अनुगमनमा कडाई गरेको छ ।

यसअघि पनि तोकिएको मूल्य भन्दा बढी लिने होटल तथा पसलेलाई कालोबजारी गरेको कसुरमा एक लाखसम्म जरिवाना तिराएको थियो ।